Old Cycle Cost Only ₹18 in 1934 : काळानुसार जग बदलते, पण काही आठवणी कायम आपल्या मनात घर करून राहतात. अनेकांकडे आठवणींचा पेटारा आजही आहे. जुन्या वस्तू, मग त्या मातीच्या माठापासून ते जुन्या गाड्यापर्यंत अनेकजण काही वस्तू सांभाळून ठेवतात. काहीजण आपण घेतलेल्या पहिल्या वस्तूचे बिल जपून ठेवतो. असाच एक १९३४ मधील अनमोल ठेवा समोर आला आहे. होय... ८८ वर्षांपूर्वी घेतलेल्या सायकलचे बिल समोर आले आहे. त्या वेळी सायकलची किंमत फक्त १८ रूपये इतकी होती. आज सायकलची किंमत ७ ते १० हजार रूपयांच्या आसपास असेल. सायकलचे ८८ वर्षांपूर्वीचे बिल एका व्यक्तीने सोशल मीडियावर शेअर केलेय.

सोशल मीडियावर व्हायरल झालेल्या सायकलच्या या बिलाने अनेकांच्या आठवणी ताज्या झाल्या आहेत. “९० वर्षांपूर्वीच्या सायकलचं बिल, फक्त १८ रुपये! तेव्हाचे १८ रुपये म्हणजे आजचे 1800 रुपये असतील का? असा प्रश्न युजर्सने सोशल मीडियावर विचारला आहे. सायकलचे हे ८८ वर्षांपूर्वीचे बिल पाहून अनेकांच्या डोळ्यासमोर मातीच्या रस्त्यावर धावणाऱ्या सायकली, मुलांचे हसरे चेहरे समोर आले असतील. मुलांच्या शिक्षणासाठी, कामावर जाण्यासाठी, कुटुंबाच्या आनंदासाठी त्यावेळी सायकल घेतली जात होती.

रंगीत टीव्ही आला नव्हता, दुचाकी तितक्या नव्हत्या. त्या काळात सायकल म्हणजे फक्त वाहन नव्हतं, तर एक भावना होती. गावातून शहरात जाणारी, शाळेतून घरी येणारी, मित्रांसोबत फेरफटका मारणारी ती सायकल प्रत्येकाच्या आयुष्याचा अविभाज्य भाग होती. आज बाइक आणि कारच्या या युगात सायकलचं विश्व हरवलंय. पण ८८ वर्षांपूर्वीची बिल पाहताना मन हरखून जातं. त्या १८ रुपयांमध्ये किती प्रेम, किती मेहनत आणि किती आनंद सामावला असेल, याची कल्पना करता येत नाही. तुम्ही कधी सायकल चालवली? तुम्ही किती रूपयांना सायकल विकत घेतली? सायकलसोबतची तुमची आठवण काय जोडली?