सोशल मीडिया आणि डिजिटल प्लॅटफॉर्मच्या माध्यमातून रुग्णांना आकर्षित करण्यासाठी केल्या जाणाऱ्या वैद्यकीय जाहिरातींवर आता अधिक लक्ष ठेवले जाणार आहे. नॅशनल मेडिकल कमिशन (NMC) ने डॉक्टर आणि आरोग्य संस्थांसाठी नव्या मार्गदर्शक तत्त्वांद्वारे वैद्यकीय जाहिरातींमधील पारदर्शकतेवर भर दिला आहे. रुग्णांची दिशाभूल रोखण्यासाठी हा नियम काढण्यात आल्याचं म्हटले जात आहे.

AI च्या मदतीने खोटे रिव्ह्यू

नवीन नियमांनुसार, डॉक्टर आणि रुग्णालयांना AI चा वापर करून बनावट रुग्ण रिव्ह्यू, कौतुक करणारे सर्टिफिकेट किंवा जाहिरात तयार करता येणार नाही. अशा खोट्या रिव्ह्यूमुळे रुग्णांची दिशाभूल होऊ शकते. तसेच डॉक्टर किंवा रुग्णालयाच्या प्रत्यक्ष सेवांबाबत चुकीची प्रतिमा निर्माण होण्याची शक्यता असते.

‘आफ्टर आणि बिफोर' चे फोटो

कॉस्मेटिक सर्जरी, हेअर ट्रान्सप्लांट आणि इतर वैद्यकीय प्रक्रियांच्या जाहिरातींमध्ये उपचारांपूर्वीचे आणि उपचारांनंतरचे फोटो मोठ्या प्रमाणात वापरले जातात. हे फोटो वापरून रुग्णांना आपला चांगला दर्जा दाखवला जातो आणि रुग्ण त्याकडे आकर्षित होतात. त्यामुळे दिशाभूल करणारे ‘बिफोर-अँड-आफ्टर’ फोटो किंवा व्हिडिओ व्हायरल करण्याबाबत डॉक्टर आणि हॉस्पिटलने सावधगिरी बाळगणे आवश्यक आहे.

खोटे दावे करता येणार नाही

कोणत्याही आजारावरील उपचार हमखास यशस्वी होतील, १०० टक्के परिणाम मिळतील किंवा चमत्कारिकरीत्या रोग बरा होईल, अशा प्रकारचे दावे करून जाहिरात करता येणार नाही. प्रत्येक रुग्णाची प्रकृती, आजाराची तीव्रता आणि उपचारांना मिळणारा प्रतिसाद वेगवेगळा असतो. त्यामुळे अशा हमी देणाऱ्या जाहिराती अयोग्य ठरू शकतात.

सोशल मीडिया पोस्ट

हे नियम केवळ होर्डिंग्ससारख्या जाहिरातींपुरते मर्यादित नसून इंस्टाग्राम, फेसबुक, यूट्यूब यांसारख्या डिजिटल माध्यमांना देखील लागू होतात. डॉक्टरांनी सोशल मीडियावर माहिती देताना ती तथ्यांवर आधारित असल्याची काळजी घेणे आवश्यक असल्याचं या नियमांमध्ये सांगण्यात आले आहे. या नव्या नियमांमुळे रुग्णांना चांगल्या हॉस्पिटल किंवा डॉक्टरची निवड करता येणार आहे. आकर्षक जाहिराती किंवा बनावट रिव्ह्यूवर विश्वास ठेवण्याऐवजी पात्र डॉक्टरांचा सल्ला आणि उपचारांशी संबंधित योग्य माहितीच्या आधारे निर्णय घेणे रुग्णांसाठी महत्त्वाचे ठरणार आहे.