Narasapur-Chennai Vande Bharat Express : नरसापूर ते चेन्नई या मार्गावर आजपासून वंदे भारत एक्सप्रेस धावणार आहे. ​ही व्यावसायिक सेवा असेल असे भारतीय रेल्वेकडून स्पष्ट करण्यात आले आहे. चेन्नई ते नरसापूर ही सेवा १७ डिसेंबरपासून सुरू होणार आहे. या नव्या वंदे भारत एक्सप्रेसमुळे चेन्नई आणि नरसापूर या दोन शहरातील अंतर कमी होणार आहे. दोन शहरातील प्रवास आरामदायी अन् वेगात होईल.

२०६७७ एमजीआर चेन्नई सेंट्रल - विजयवाडा ही वंदे भारत एक्सप्रेस आता नरसापूरपर्यंत वाढवण्यात येणार आहे. १७ डिसेंबरपासून चेन्नईमधून ही ट्रेन आठवड्यातून सहा दिवस धावणार आहे, असे दक्षिण रेल्वेकडून सांगण्यात आले आहे. तर ट्रेन क्रमांक २०६७८ विजयवाडा ते डॉ. एमजीआर चेन्नई सेंट्रल वंदे भारत एक्सप्रेस आजपासून नरसापूरपासून सुटणार आहे. या ट्रेनचा विस्तार करण्यात आला आहे. मंगळवार वगळून आठवड्यातून सहा दिवस ही ट्रेन धावणार आहे.

नरसापूर ते चेन्नई हे अंतर जवळपास ६५५ किमी इतके आहे. सध्या या प्रवासासाठी १२ ते १३ तास लागतात. पण वंदे भारत एक्सप्रेसमुळे हे अंतर ८.५५ तासात पूर्ण होईल. नरसापूरमधील लोकांना चेन्नईला जाण्यासाठी आरामदायी प्रवासाचा पर्याय मिळाला आहे. शिक्षण, व्यापार अन् पर्यटनाला या वंदे भारत एक्सप्रेसमुळे चालना मिळेल.

कोणकोणत्या स्थानकावर थांबणार ?

डॉ एमजीआर चेन्नई सेंट्रल आणि नरसापूर यादरम्यान वंदे भारत एक्सप्रेस सात स्थानकावर थांबेल. सेमी-हाय-स्पीड ट्रेनला रेनिगुंटा जंक्शन, नेल्लोर, ओंगोल, तेनाली जंक्शन, विजयवाडा जंक्शन, गुडीवाडा जंक्शन आणि भीमावरम टाउन असे थांबे असतील.

वंदे भारतचे वेळापत्रक काय?

नरसापूरला निघणारी वंदे भारत एक्सप्रेस चेन्नईहून सकाळी ०५:३० वाजता निघेल आणि नरसापूर येथे दुपारी दोन वाजता पोहचेल. परतीच्या प्रवासाला ही ट्रेन नरसापूरहून १४:५० वाजता निघेल आणि चेन्नईला २३:४५ वाजता पोहोचेल.

नरसापूर -चेन्नई वंदे भारत ट्रेन तिकीट किती?

नरसापूर ते चेन्नई दरम्यान एसी चेअर कारने प्रवास करण्यासाठी तिकिटाची किंमत १६३५ रुपये इतकी आहे. तर एक्झिक्युटिव्ह चेअर कारसाठी ३०३० रूपये मोजावे लागतील.