महाराष्ट्रात गेल्या काही दिवसांपासून पावसाने उघडीप दिली आहे. मात्र गेल्या आठवड्याभरापासून पाऊस नसल्यानं शेतकरी चिंतेत पडलाय. शेतकऱ्यांना दुबार पेरणीचं संकट सतावत आहे. शेतकरी मित्रांनो काळजी करू नका, हवामान विभागानं एक दिलासादायक बातमी दिली आहे.

राज्यात पुन्हा एकदा पावसाचा जोर वाढण्याची शक्यता आहे. २१ जुलैनंतर महाराष्ट्रातील अनेक जिल्ह्यांमध्ये मुसळधार ते अतिमुसळधार पावसाचा अंदाज वर्तवण्यात आलाय. तर पुढील १० तासांमध्ये १५ राज्यांमध्ये मुसळधार पाऊस पडणार असल्याचा अंदाज आहे.

हवामान विभागाकडून तब्बल १५ राज्यांना पावसाचा हाय अलर्ट देण्यात आलाय. पुढील दहा तासांमध्ये या राज्यांमध्ये जोरदार पाऊस होणार आहे. मुसळधार ते अतिमुसळधार पावसाची शक्यता असून या काळात ६० किमी वेगाने वारे वाहण्याची शक्यता आहे. हवामान विभागाकडून नागरिकांना सतर्कतेचा इशारा देण्यात आलाय. या काळात मच्छिमारांनी समुद्रात मासेमारीसाठी जाऊ नये, असं आवाहनही भारतीय हवामान विभागाने केलंय.

कोणत्या राज्यांना हाय अलर्ट दिलाय?

हवामान विभागाने दिलेल्या माहितीनुसार दिल्ली, उत्तर प्रदेश, बिहार, राजस्थान, मध्य प्रदेश, झारखंड, पश्चिम बंगाल, सिक्किम, आसाम, उत्तर प्रदेश, हिमाचल प्रदेश, उत्तराखंड, मेघालय आणि मणिपूर या राज्यांमध्ये मुसळधार ते अतिमुसळधार पाऊस होईल, अशी शक्यता आहे. उत्तर भारत आणि पूर्व भारतात पुढील १० तासांमध्ये पावसाचा जोर चांगलाच वाढण्याची शक्यता आहे, असा अंदाज वर्तवण्यात आलाय.

महाराष्ट्रात पावसाची स्थिती काय?

जुलैच्या पहिल्या आठवड्यात राज्यात सर्वत्र मुसळधार पाऊस झाला. मात्र त्यानंतर पावसाने खंड घेतल्यानं शेतकऱ्यांची चिंता वाढली आहे. आता पुन्हा एकदा राज्यात पावसाचा जोर वाढणार असल्याचा अंदाज हवामान विभागाकडून वर्तवण्यात आलाय. २० जुलैपासून राज्यातील अनेक भागांमध्ये जोरदार पावसाची शक्यता आहे. पुढील काही तासांमध्ये मराठवाडा, कोकण आणि मध्य महाराष्ट्रात मध्यम स्वरुपाच्या पावसाची शक्यता आहे.