नवी दिल्ली: मोदी सरकार (Modi Government) विरोधात विरोधकांची मोट बांधण्यासाठी ममता बॅनर्जी (Mamata Banerji) दिल्लीतील विरोधी पक्षाच्या भेटी गाठी घेत आहेत. पण भाजप नेते आणि केंद्रीय मंत्री नितीन गडकरी (Nitin Gadkari) यांची भेट घेणार असल्याने राजकीय चर्चा रंगल्या आहेत.

पश्चिम बंगालच्या मुख्यमंत्री ममता बॅनर्जी आज नितीन गडकरी यांची भेट घेणार आहेत. आज दुपारी २ वाजता नितीन गडकरी यांच्या दिल्लीतील निवास्थानी या दोन्ही नेत्यांची भेट होईल. पंतप्रधान मोदी यांच्यानंतर गडकरी हे दुसरे भाजप नेते आहेत ज्यांना ममता बॅनर्जी आज भेटणार आहेत. याशिवाय डीएमके नेत्या कनिमोई यांची सांयकाळी ४ वाजता ममता भेट घेणार आहेत.

दरम्यान, मंगळवारी त्यांनी पंतप्रधान नरेंद्र मोदी (Narendra Modi) यांची भेट घेतली होती. बुधवारी, त्या कॉंग्रेसच्या अंतरिम अध्यक्षा सोनिया गांधी यांना त्यांच्या निवासस्थानी भेट देण्यासाठी 10 जनपथ येथे पोहोचल्या. या बैठकीला राहुल गांधीही उपस्थित होते.

सोनिया यांना भेटल्यानंतर ममतांनी सांगितले की कॉंग्रेस अध्यक्षांनी मला चहासाठी बोलावले होते, राहुल जी तिथे होते. आम्ही राजकीय परिस्थिती, पेगासस आणि कोरोनामधील परिस्थिती आणि विरोधी पक्षाच्या ऐक्याबद्दल चर्चा केली. खूप छान भेट झाली. मला वाटते की हे भविष्यात सकारात्मक परिणाम आणेल.

Edited By: Pravin Dhamale