Madhya Pradesh News: मध्य प्रदेशातील सिवनी येथून एक ह्रदयद्रावक घटना समोर आली आहे. सिवनीच्या कुरई पोलीस ठाण्यांतर्गत असलेल्या धोबीसरा गावात चार मुलांचा तलावात बुडून मृत्यू झाल्याची घटना उघडकीस आली. या दुर्देवी घटनेने परिसरात हळहळ व्यक्त केली जात आहे.. (MP Latest News)

पाण्याचा अंदाज न आल्याने घडला अनर्थ...

याबाबत अधिक माहिती अशी की, रविवारी दुपारी गावातील काही मुले गावाजवळील तलावात आंघोळीसाठी गेली होती. चांगला पाऊस झाल्याने तलाव 10 फुटांपर्यंत पाण्याने भरला होता. मुलांना अंदाज न आल्याने ती पोहता पोहता खोल पाण्यात बुडाली.

हृतिक चक्रवर्ती (१०), आयुष विश्वकर्मा (८), आरव तुमराम (५.५) आणि ऋषभ विश्वकर्मा (५) अशी या अपघातात मृत्यू झालेल्या मुलांची नावे आहेत. सर्व मुलांचे वय अवघे ५ ते १० वर्षे असल्याचे सांगण्यात येत आहे. पोलिसांनी घटनास्थळी पोहोचून चारही मृतदेह आपल्या ताब्यात घेऊन पोस्टमॉर्टमसाठी पाठवले.

संपूर्ण गाव शोकसागरात...

शेतातून घरी आल्यानंतर पालकांना मुले घरात न आढळल्याने त्यांनी शोधाशोध सुरू केली. सायंकाळी 6.30 वाजेच्या सुमारास धोबीसरा ते दरासी रस्त्यावरील तलावाबाहेर मुले आढळून आली. चारही मुले बुडून मृत्यू पावल्याचे समजताच संपूर्ण गावावर शोककळा पसरली. दरम्यान, सोमवारी सकाळी पंचनामा केल्यानंतर मृतदेह नातेवाईकांच्या ताब्यात देण्यात येणार आहेत. तसेच पोलिस याबाबतचा अधिक तपास करत आहेत. (Latest Marathi News)