मध्य प्रदेशातील ग्वाल्हेर मधून धक्कादायक घटना समोर आली आहे. इयत्ता अकरावीतील एका विद्यार्थिनीने परीक्षेत कमी गुण मिळाल्याच्या नैराश्येतून बंदुकीने स्वतःवर गोळी झाडून आत्महत्या केली. या घटनेने परिसरात भीतीचे वातावरण निर्माण झाले असून मृत मुलीच्या कुटुंबियांवर दुःखाचा डोंगर कोसळला आहे.

मिळालेल्या माहितीनुसार, ही घटना बहोदापूर पोलीस ठाण्याच्या हद्दीतील घोसीपुरा भागात, गिरराज जी मंदिराजवळ घडली. मृत विद्यार्थिनीचे नाव ट्विंकल अहिरवार अशी असून ती इंडो-तिबेटियन बॉर्डर पोलिस (ITBP) मध्ये कार्यरत असलेल्या जवानाची मुलगी होती. सकाळी सुमारे ७ वाजण्याच्या सुमारास घरात गोळीबाराचा आवाज आला. त्या वेळी घरातील सर्व सदस्य झोपेत होते. आवाज ऐकताच कुटुंबीयांनी धावत जाऊन पाहिले असता, तिच्या खोलीचा दरवाजा आतून बंद होता.

दरवाजा तोडून आत प्रवेश केल्यानंतर मुलगी रक्ताच्या थारोळ्यात पडलेली दिसली. तिच्या जवळच पिस्तूल पडलेले होते. कुटुंबीयांनी तात्काळ तिला जवळच्या रुग्णालयात नेले. त्यानंतर तिला जयआरोग्य रुग्णालय येथे हलवण्यात आले, मात्र डॉक्टरांनी तपासून तिला मृत घोषित केले.

घटनास्थळाची पाहणी करताना पोलिसांना एक सुसाईड नोट सापडली. इंग्रजीत लिहिलेल्या या चिठ्ठीत, “मी माझ्या कुटुंबाचा अभिमान वाढवू शकले नाही, म्हणून हे पाऊल उचलत आहे,” असे नमूद करण्यात आले होते. प्राथमिक माहितीनुसार, काही दिवसांपूर्वीच तिचा इयत्ता अकरावीचा निकाल लागला होता आणि तिला अपेक्षेपेक्षा कमी गुण मिळाले होते. याच तणावामुळे तिने हे टोकाचे पाऊल उचलल्याची शक्यता पोलिसांनी व्यक्त केली आहे.

या प्रकरणी पोलिसांनी आकस्मिक मृत्यूची नोंद करून सुसाईड नोट आणि पिस्तूल जप्त केले असून पुढील तपास सुरू आहे. या घटनेमुळे परिसरात शोककळा पसरली असून, विद्यार्थ्यांवरील वाढत्या शैक्षणिक दबावाबाबतही चिंता व्यक्त केली जात आहे.