मुख्यमंत्रिपदावरून कर्नाटकात पुन्हा एकदा राजकारण तापलंय. कर्नाटकचे मुख्यमंत्री सिद्धरामय्या आणि उपमुख्यमंत्री डी.के शिवकुमार यांच्यातील तणाव लक्षणीयरीत्या वाढला आहे. सुत्रांनी दिलेल्या माहितीनुसार, डी.के शिवकुमार यांच्या काही मंत्र्यांनी दिल्लीत काँग्रेसचे राष्ट्रीय अध्यक्ष मल्लिकार्जून खरगे यांची भेट घेतल्याचे वृत्त आहे. या भेटीत ठरलेल्या करारानुसार,डी.के शिवकुमार यांना आता मुख्यमंत्री करावे, या विषयावर चर्चा झाली.

सुत्रांनी दिलेल्या माहितीनुसार, शिवकुमार यांच्या जवळचे मानले जाणारे तीन आमदार आणि एक मंत्री गुरूवारी सायंकाळी दिल्लीत दाखल झाले. मंत्री एन. चलुवरायसामी, आमदार इक्बाल हुसैन, एच.सी बालकृष्ण, एस.आर श्रीनिवास आणि टी.डी. राजेगौडा यांनी मल्लिकाअर्जून यांची निवासस्थानी जाऊन भेट घेतली. तर, डी.के शिवकुमार यांचे समर्थक आमदार टी.डी राजेगौडा यांची काँग्रेसचे संघटन महासचिव वेणुगोपाल यांची भेट घेतली.

निवासस्थानी झालेल्या या बैठकीनंतर काही वेळातच हे नेते तेथून निघून गेले. मुख्यमंत्री सिद्धरामय्या यांच्या नेतृत्वाखाली कर्नाटक सरकारला अडीच वर्षे पूर्ण झाली. सरकार स्थापन करण्यापूर्वी त्यांच्यात करार झाला होता. या करारानुसार, उपमुख्यमंत्री डी.के शिवकुमार यांना मुख्यमंत्री करावे, यासाठी डी.के शिवकुमार गट आग्रही आहे. यावेळी डी.के शिवकुमार यांच्या निकटवर्तीयांनी काँग्रेसचे राष्ट्रीय अध्यक्ष मल्लिकाअर्जून खर्गे यांची भेट घेतली. तसेच या करारावर चर्चा केली.

दरम्यान, याविषयी मुख्यमंत्री सिद्धरामय्या यांनी 'माझी सत्ता आता आणि भविष्यातही सुरक्षित आहे आणि राहिल', असं म्हटलं आहे. 'जनतेला दिलेले आश्वासनं पूर्ण करण्यासाठी माझे प्रयत्न सुरू आहेत', असंही सिद्धरामय्या यांनी म्हटलं आहे. यावेळी सिद्धरामय्या यांना ' पाच वर्षांसाठी मुख्यमंत्री राहणार का? ' असा प्रश्न विचारण्यात आला होता. यावेळी त्यांनी, अनावश्यक चर्चा असल्याचं म्हटलंय. 'केवळ अडीच वर्षांत मंत्रिमंडळ फेरबदलाची चर्चा झाली होती. त्यानंतर मुख्यमंत्री बदलण्याचा मुद्दा पुढे आला. ३४ मंत्रिपदांपैकी २ पदे सध्या रिक्त आहेत. ते रिक्त मंत्रिपद फेरबदलादरम्यान भरले जातील',असंही त्यांनी स्पष्ट केलं.