झारखंडच्या रांचीमधून एक धक्कादायक बातमी समोर येत आहे. एका किरकोळ वादाचा शेवट रक्तरंजित हाणामारीत झाला आहे. कांके रोडवरील चौपाटी रेस्टॉरंटमध्ये शाकाहारी बिर्याणी ऐवजी मासांहारी बिर्याणी दिल्याचा आरोप करत ग्राहक आणि रेस्टॉरंट कर्मचाऱ्यांमध्ये वाद झाला. हा वाद काही क्षणात चिघळला. या घटनेदरम्यान, रेस्टॉरंटच्या मालकावर गोळी झाडण्यात आली. या हल्ल्यात त्यांचा मृत्यू झाला.

ही धक्कादायक घटना शनिवारी रात्रीच्या सुमारास घडली. अभिषेक असे आरोपीचे नाव असून, विजय नाग असे मृत रेस्टॉरंट मालकाचे नाव आहे. कांके रोडवर चौपाटी रेस्टॉरंट आहे. घटनेच्या दिवशी काही जण जेवायला रेस्टॉरंटमध्ये गेले होते. तिथे आरोपी अभिषेक देखील जेवायला गेला होता.

आरोपीनं बिर्याणी ऑर्डर केली होती. रेस्टॉरंटमध्ये शाकाहारी ऐवजी मासांहारी बिर्याणी दिल्याचा आरोप त्यानं केला. अभिषेकनं गंभीर आरोप वाद घालण्यास सुरूवात केली. रेस्टॉरंटमधील कर्मचारी आणि अभिषेकमध्ये तुफान राडा झाला. हा वाद काही क्षणात चिघळला. वादाचं रूपांतर हाणामारीत झालं.

या घटनेदरम्यान, रेस्टॉरंट मालक विजय़ नाग यांनी हस्तक्षेप केला. त्यांच्यावर गोळी झाडण्यात आली. गंभीर अवस्थेत त्यांना तातडीने रूग्णालयात दाखल करण्यात आले. मात्र, उपचारादरम्यान, त्यांचा मृत्यू झाला. या घटनेनंतर आरोपी अभिषेक फरार झाला. घटनेची माहिती मिळताच पोलिसांनी घटनास्थळी धाव घेतली. पोलिसांनी घटनास्थळावरू पुरावे गोळा करून तपासाची चक्रे फिरवली आहेत. आरोपीचा शोध पोलिसांकडून सुरू आहे.