Jantar Mantar Viral Girl Controversy: पंतप्रधान नरेंद्र मोदी यांच्याबाबत आक्षेपार्ह वक्तव्य केल्यामुळे वादाच्या भोवऱ्यात अडकलेली अल्पवयीन मुलगी पहिल्यांदाच प्रसारमाध्यमांसमोर आली आहे. या संपूर्ण प्रकरणाबद्दल तिने पुन्हा एकदा दिलगिरी व्यक्त करत आपण कोणाच्याही दबावाखाली माफी मागितलेली नसून ती मनापासून मागितली असल्याचे स्पष्ट केले. तसेच, या घटनेनंतर आपल्याला सतत धमक्या मिळत असल्याचा दावाही तिने केला.

'एबीपी न्यूज'शी संवाद साधताना ती म्हणाली, "आज माझा वाढदिवस आहे. पंतप्रधान नरेंद्र मोदी यांनी मला माफ करून माझ्या वाढदिवसाची सर्वात मोठी भेट दिली आहे." ती पुढे म्हणाली की, हे प्रकरण इतके मोठे होईल, याची तिला अजिबात कल्पना नव्हती. माझ्याकडून मोठी चूक झाली आहे. मला त्याबद्दल खूप पश्चात्ताप होत आहे. मी कोणाच्याही दबावाखाली नाही, तर स्वतःहून आणि मनापासून माफी मागितली आहे," असे तिने सांगितले.

या घटनेबाबत अधिक माहिती देताना तिने सांगितले की, वाढदिवसानिमित्त कपड्यांची खरेदी करण्यासाठी ती एका मैत्रिणीसोबत दिल्लीतील कनॉट प्लेस येथे गेली होती. त्यावेळी काही युट्यूबर्स आणि उपस्थित लोकांनी तिला काही बोलण्यास सांगितले. त्याच वेळी तिच्याकडून आक्षेपार्ह शब्दांचा वापर झाला. मात्र, आपली चूक लक्षात येताच दुसऱ्याच दिवशी तिने सार्वजनिकरीत्या माफी मागितल्याचेही तिने स्पष्ट केले.

"मला सतत धमक्या येत आहेत. काही लोक आमच्या घरी येत आहेत. पोलिसही वारंवार भेट देत आहेत. त्यामुळे आम्ही घाबरलो आहोत," असे ती पुढे म्हणाली. स्वतःच्या हिमतीवर शिक्षण घेत असून भविष्यात चांगले करिअर घडवण्याची इच्छा असल्याचेही तिने सांगितले.

यावेळी तिने पंतप्रधान नरेंद्र मोदी यांचे आभार मानत, "मला माफ केल्याबद्दल त्यांचे मनापासून आभार. ही माझ्यासाठी वाढदिवसाची सर्वात मोठी भेट आहे," असे म्हटले. तसेच, लहान मुलांनी सोशल मीडियाचा वापर करताना अधिक जबाबदारीने वागावे, असे मतही तिने व्यक्त केले.