2 Soldiers Martyred, 10 Injured, 1 Terrorist Killed in Kulgam : जम्मू-काश्मीरमधील कुलगाम येथे भारतीय सैन्य आणि दहशतवाद्यांमध्ये चकमक झाली आहे. या चकमकीत भारतीय सैन्याचे दोन जवान शहीद झाले, तर दहा जवान जखमी झाले आहेत. भारतीय सैन्याने प्रत्युत्तरादाखल एका दहशतवाद्याचा खात्मा केला आहे. सध्या सुरक्षा दल कुलगाममधील दुर्गम जंगल परिसरात दहशतवाद्यांचा शोध घेण्यासाठी ड्रोन, हेलिकॉप्टर आणि इतर सर्व आवश्यक साधनांचा वापर करत आहे. ही चकमक अद्यापही सुरू असून, परिस्थितीवर सैन्याचे बारीक लक्ष आहे. कुलगाममध्ये ही चकमक नवव्या दिवशीही सुरू आहे.

चिनार कोरकडून शहीद जवानांना श्रद्धांजली

चिनार कोरने सोशल मीडियावर पोस्ट करत या घटनेची पुष्टी केली आहे. पोस्टमध्ये म्हटले की, ऑप अखल, कुलगाम... चिनार कोर राष्ट्रासाठी कर्तव्य बजावताना शहीद झालेल्या वीर लेफ्टनंट कर्नल प्रीतपाल सिंग आणि सिपाही हरमिंदर सिंग यांच्या सर्वोच्च बलिदानाला श्रद्धांजली अर्पित करते. त्यांचे शौर्य आणि समर्पण आम्हाला नेहमी प्रेरणा देत राहील. #भारतीयसेना शोकाकुल कुटुंबियांप्रती गहन सहवेदना व्यक्त करते आणि त्यांच्या दुखात सहभागी आहे."

घाटीतील सर्वात लांबलचक दहशतवाद विरोधी मोहीम

जम्मू-काश्मीरमधील कुलगाम येथील अखल जंगल परिसरात सुरू असलेली चकमक ही खोऱ्यातील सर्वात लांबलचक दहशतवादविरोधी मोहिमांपैकी एक आहे. एक ऑगस्ट रोजी चकमक सुरू झाली आहे. या चकमकीत आतापर्यंत दोन दहशतवादी ठार झाले आहेत. दक्षिण काश्मीरमधील कुलगाम जिल्ह्यातील अखल येथील जंगल परिसरात दहशतवाद्यांच्या उपस्थितीची गुप्त माहिती मिळाल्यानंतर सुरक्षा दलांनी घेराबंदी आणि शोधमोहीम सुरू केली होती.