इस्रायलच्या डिफेन्स फोर्सेसच्या दाव्यानुसार, ऑपरेशन रोरिंग लायनच्या अंतर्गत इराणच्या गुप्तचर विभागातील दोन वरिष्ठ अधिकाऱ्यांना ठार करण्यात आले. आयडीएफच्या माहितीनुसार, हा हल्ला गुप्तचर यंत्रणांच्या माहितीच्या आधारे करण्यात आला. तेहरानस्थित मंत्रालयावरही हल्ला करण्यात आला.

अमेरिका-इस्रायलच्या इराणवरील हल्ल्यानंतर तिसऱ्या दिवसानंतरही युद्धभडका कायम आहे. दोन्हींकडून क्षेपणास्त्रे, रॉकेट आणि ड्रोन हल्ले सुरू आहेत. इस्रायलच्या डिफेन्स फोर्सेस (IDF) च्या दाव्यानुसार, इराणच्या गुप्तचर विभागाच्या मंत्रालयातील वरिष्ठ अधिकाऱ्यांना सैन्यानं टार्गेट केलं होतं. आयडीएफच्या अधिकृत माहितीनुसार, ही कारवाई ऑपरेशन रोरिंग लायन अंतर्गत करण्यात आली असून, पहिल्या टप्प्यातच या अधिकाऱ्यांना टिपलं. मृतांमध्ये इराणच्या रिव्होल्युशनरी गार्डच्या अनेक अधिकाऱ्यांचाही समावेश आहे. तसेच इराणच्या मंत्रालयातील उपमंत्री सैयद यह्या हमिदी हे देखील या हल्ल्यात मारले गेल्याचा दावा आयडीएफने केला आहे.

इराणच्या गुप्तचर विभागाच्या उपमंत्र्यांचा मृत्यू

आयडीएफच्या माहितीनुसार, इस्रायलमधील घडामोडींवर लक्ष ठेवून असलेल्या गुप्तचर मंत्रालयाचे उपमंत्री सैयद यह्या हमिदी यांचाही या हल्ल्यात मृत्यू झाला आहे. हमिदी हे यहुदी, पाश्चिमात्य देशांशी संबंधित नागरिक आणि विदेशांत सरकारविरोधातील यंत्रणांना टार्गेट करणाऱ्या कारवायांचे नेतृत्व करत असल्याचा आरोपही यावेळी करण्यात आला. याशिवाय गुप्तचर मंत्रालयातील हेरगिरी विभाग प्रमुख जलाल पूर हुसैन हे देखील या हल्ल्यात मारले गेल्याचा दावा करण्यात आला आहे. गुप्तचर विभागाकडून खात्रीशीर माहिती मिळाल्यानंतर ही कारवाई करण्यात आल्याचाही दावा करण्यात आला.

इस्रायल सैन्याच्या दाव्यानुसार, या कारवाईत अन्य वरिष्ठ अधिकारीही टार्गेटवर होते. तसेच इस्रायलच्या वायूसेनेने तेहरानस्थित इराणच्या गुप्तचर मंत्रालयाच्या मुख्यालयावरही हल्ला चढवला. आयडीएफनुसार, ही कारवाई विभागीय सुरक्षा आणि देशातील नागरिकांची सुरक्षितता लक्षात घेऊन केली आहे. मात्र, याबाबत इराणकडून कोणत्याही विभागाकडून तात्काळ अधिकृत प्रतिक्रिया आलेली नाही. दरम्यान, इस्रायल आणि इराण यांच्यात अलीकडच्या काही घटनांनंतर संघर्ष अधिकच चिघळला आहे. दुसरीकडे, इस्रायलच्या दाव्यानंतर त्याला अद्याप अधिकृत दुजोरा कुणीही दिलेला नाही.