Israel-Hamas War

इस्राइलच्या सैन्याने ११ लाखांपेक्षा अधिक गाझावासियांसह संयुक्त राष्ट्राच्या अधिकारी आणि कर्मचाऱ्यांना २४ तासांच्या आत दक्षिण भागात निघून जाण्याचा इशारा दिला आहे. संयुक्त राष्ट्राने यावर चिंता व्यक्त केली आहे. इस्राइल-गाजा सिमेवर इस्राइलने मोठ्या प्रमाणात सैन्याची जमवाजमव सुरू केल्यामुळे हमासचे नामोनिशाण मिटविण्यासाठी पेटून उठलेले इस्राइल सरकार कोणत्याही क्षणी जमिनीवरील हल्ला तीव्र करू शकते. त्यामुळे संपूर्ण अरबस्तानात चिंतेचं वातावरण पसरलं आहे.

हमास चे आतंकवादी गाझा शहरातील बंकरमध्ये लपून हल्ले करत असून नागरिकांचा ढाल म्हणून वापर करत आहेत. त्यामुळे नागरिकांनी त्यांच्यापासून लांब राहावं. येत्या काही तासात इस्राइल मोठी कारवाई करणार आहे. याचा नागरिकांना त्रास होऊ नये आणि आतंकवाद्यांविरोधात कारवाई करताना अडचणी येऊ नयेत यासाठी दक्षिणेकडे जाणं योग्य ठरेल, असं इस्राइलने म्हटलं आहे.

संभाव्य विनाशकारी स्थितीतून बाहेर पडायचं असेल तर गाझाच्या नागरिकांना स्थलांतराचा दिलेला आदेश मागे घेण्याचं आवाहन संयुक्त राष्ट्राने इस्राइलला केलं आहे. दरम्यान इस्राइलच्या आदेशाचा परिणाम संयुक्त राष्ट्राचे कर्मचारी, शाळा, हॉस्पिटलवरही पडू शकतो, त्यामुळे संयुक्त राष्ट्रानेही आपलं कामकाज दक्षिणेत स्थलांतर केलंय.