ताजमहल हे जगभरातील सर्वात सुंदर स्थळांपैकी एक आहे. ताजमहल या स्थळाला प्रेमाचं प्रतिक मानलं जातं. गेल्या काही दिवसांपासून ताजमहलवर कोणाचा मालकी हक्क आहे, यावरून चर्चा सुरु झाली आहे. ताजमहलच्या मालकी हक्कावरून सोशल मीडियावरही जोरदार चर्चा सुरु आहे. खरंतर उत्तर प्रदेशच्या वक्फ बोर्डाने ताजमहलवर दावा केल्यानंतर चर्चेला सुरुवात झाली होती. या दाव्यानंतर वक्फ बोर्ड आणि भारत सरकारमधील वाद कोर्टात पोहोचला होता.

फिरोजाबादमधील व्यापारी इरफान बेदर यांनी १९९८ साली ताजमहलाच्या मालकीवरून वक्फ बोर्डात धाव घेतली होती. त्यांनी वक्फ बोर्डात जाऊन ताजमहलला वक्फ बोर्डाचा प्रॉपर्टी म्हणून घोषित करण्याची मागणी केली. ताजमहलचं धार्मिक आणि ऐतिहासिक महत्व आहे. त्यामुळे ताजमहलास वक्फ बोर्डाची प्रॉपर्टी मानली पाहिजे. त्यानंतर वक्फ बोर्डाने ताजमहलचे व्यवस्थापन करणाऱ्या भारतीय पुरातत्व सर्वेक्षण विभागाला नोटीस पाठवली.

इरफान बेदर यांनी २००४ साली इलाहाबाद हायकोर्टात पोहोचून कायदेशीर मदत मागितली. वक्फ बोर्डाने २००५ साली ताजमहलला आमची प्रॉपर्टी असल्याचं म्हटलं. वक्फ बोर्डाच्या घोषणेला सुप्रीम कोर्टात आव्हान देण्यात आलं. मीडिया रिपोर्टनुसार, सुप्रीम कोर्टाने वक्फ बोर्डाकडे पुरावे मागितले. शहाजहाँ यांनी स्वत: ताजमहल वक्फ बोर्डाची प्रॉपर्टी घोषित केली होती, अशी घोषणा केल्याचे पुरावे मागितले. पुढे सुप्रीम कोर्टाने वक्फच्या निर्णयावर स्थगिती आणली. त्यानंतर कोर्टाने चौकशीचे आदेश दिले.

वक्फ बोर्डाला २०१८ सालच्या मध्यात कागदपत्राशिवाय ताजमहलावर हक्क सांगता येणार नाही, ही बाब लक्षात आली. त्यानंतर बोर्डाने ताजमहलवरील दावा सोडला. मीडिया रिपोर्टनुसार, ताजमहलला संरक्षित इमारत घोषित केली. तेव्हापासून ताजमहल भारत सरकारची प्रॉपर्टी आहे. याआधी १८५८ साली मुघल बादशाह बहादूर शाह जफरची प्रॉपर्टीचा ताबा ब्रिटेनच्या राणीकडे गेला होता.