नवी दिल्ली - भारतात कोरोना प्रकरणांचा वेग थांबण्याचे नाव घेत नाही आहे. जगभरात अद्यापही कोरोनाचा (Corona) फैलाव सुरु आहे. भारतातही कोरोना विषाणूचा संसर्ग दिवसागणिक वाढताना दिसत आहे. देशात सलग तिसऱ्या दिवशी वीस हजारांहून अधिक नवीन कोरोना रुग्णांची नोंद झाली आहे. आरोग्य मंत्रालयाने जारी केलेल्या नवीन आकडेवारीनुसार, गेल्या 24 तासात 20,044 नवीन कोरोनाबाधित रुग्ण आढळले आहेत, तर 56 लोकांचा कोरोनामुळे मृत्यू झाला आहे.

हे देखील पाहा -

यानंतर, कोरोनाच्या एकूण सक्रिय रुग्णांची संख्या 1,40,760 वर पोहोचली आहे. यासह देशात कोरोनाबळींचा आकडा 5 लाख 25 हजार 660 वर पोहोचला आहे. कोरोनाच्या ताज्या आकडेवारीनुसार, गेल्या 24 तासांत 18,301 लोक कोरोनमुक्त झाले आहेत. कोरोनाच्या वाढत्या संसर्गामुळे प्रशासनाची चिंता वाढली आहे.

एकीकडे पावसामुळे वाढणारे संसर्गजन्य आजार आणि दुसरीकडे देशात झालेला मंकीपॉक्स व्हायरसचा शिरकाव त्यात कोरोनाचा वाढता संसर्ग यामुळे आरोग्य विभाग सतर्क झाला आहे. भारतातील दैनिक सकारात्मकता दर 4.80 टक्के आहे. रिकव्हरी रेटबद्दल बोलायचे झाले तर देशात संसर्ग बरे होण्याचे प्रमाण ९८.४८ टक्के आहे.

लसीकरणाचा आकडा 199.71 कोटी

लसीकरणाच्या आकडेवारीबद्दल बोलायचे झाले तर भारत २०० कोटींचा आकडा पार करण्याच्या अगदी जवळ आला आहे. देशातील एकूण लसीकरणाचा आकडा सध्या 199.71 कोटी आहे. गेल्या 24 तासात 22,93,627 लोकांना कोरोनाची लस देण्यात आली आहे.