भारतीय हवामान खात्यानं पुढील सात दिवसांसाठी देशभरातील विविध राज्यांना वादळी वाऱ्यासह मुसळधार पावसाचा इशारा दिला आहे. गेल्या काही दिवसांपासून महाराष्ट्र आणि देशाच्या वेगवेगळ्या भागांत थैमान घालणाऱ्या पावसाचा जोर पुढील सात दिवसही कायम राहणार आहे.

महाराष्ट्रातील कोकण, गोवा आदी भाग आणि गुजरातमध्ये पुढील ७ दिवस मुसळधार ते अतिमुसळधार पाऊस कोसळण्याचा अंदाज हवामान खात्याकडून व्यक्त करण्यात आला आहे. पंजाब, हरयाणा, हिमाचल प्रदेश, उत्तराखंड, राजस्थान आणि उत्तर प्रदेशात २७ जून ते ३ जुलै या कालावधीत विविध भागांत मुसळधार पाऊस होण्याची शक्यता आहे. तसेच ३० ते ४० किलोमीटर प्रतितास वेगाने वाहणाऱ्या वादळी वाऱ्यांसह ढगांचा कडकडाट आणि विजाही चमकतील, असा अंदाज आहे.

हवामान खात्याच्या अंदाजानुसार, मध्य प्रदेश, छत्तीसगड, झारखंड, ओडिशा, पश्चिम बंगाल, बिहार आणि सिक्कीम या राज्यांमध्ये मुसळधार पावसाची शक्यता आहे. मध्य प्रदेश आणि छत्तीसगडमध्ये १ ते ३ जुलै या काळात अतिमुसळधार पाऊस कोसळण्याचा अंदाज आहे. तामिळनाडू, कर्नाटकाचा किनारी भाग, कर्नाटक, तेलंगणा आणि केरळमध्ये २७ जून ते ३ जुलैपर्यंत मुसळधार पावसाचा इशारा देण्यात आला आहे.

केरळमध्ये २७ आणि २८ जून रोजी मुसळधार पाऊस कोसळू शकतो. तसेच कर्नाटक, आंध्र प्रदेश, रायलसीमा आणि तेलंगणात २७ ते ३० जूनपर्यंत ४० ते ६० किलोमीटर प्रतितास वेगाने वारे वाहतील. ईशान्येकडील राज्यांमध्ये बहुतांश भागांत पुढील सात दिवस हलका ते मध्यम स्वरुपाचा पाऊस पडेल. या दरम्यान विविध ठिकाणी ढगांचा गडगडाट आणि विजांचा कडकडाट आणि मुसळधार पाऊस कोसळेल.

हिमाचल प्रदेशात पूरस्थिती, बचावकार्य सुरू

हिमाचल प्रदेशातील कांगला आणि कुल्लू जिल्ह्यांत बुधवारी ढगफुटी झाली. त्यामुळे पूरस्थिती निर्माण झाली. सहा जण वाहून गेले असून ते बेपत्ता आहेत. राष्ट्रीय आणि राज्य आपत्ती व्यवस्थापन पथके, पोलीस आणि होमगार्ड यांच्या पथकांकडून त्यांचा शोध घेतला जात आहे. कुल्लू जिल्ह्यातील रेहला बिहालमध्ये ढगफुटी झाल्याने पूरस्थिती निर्माण झाली. यात तीन जण वाहून गेले. त्यांचाही शोध सुरू आहे.

दिल्लीत वादळी वाऱ्यासह मुसळधार पाऊस

दिल्लीत आज, वादळी वाऱ्यासह पाऊस कोसळण्याची शक्यता आहे. हवामान विभागानुसार, शहरात सकाळी साडेआठ वाजता किमान तापमान २९ अंश सेल्सियस इतके नोंदले गेले. तर कमाल तापमान ३७ अंश सेल्सियस इतके राहील.