आसाममधील जोरहाट एअरबेसवर शनिवारी भारतीय वायुसेनेचे (IAF) 'AN-32' हे मालवाहू विमान लँडिंगदरम्यान दुर्घटनाग्रस्त झाले. धावपट्टीवर उतरल्यानंतर अचानक या विमानाला भीषण आग लागली. लँडिंग यशस्वी झाल्यानंतर अवघ्या काही सेकंदांतच विमानातून आगीच्या प्रचंड लपट उठल्याने एअरबेसवर एकच खळबळ उडाली.

वायुसेनेच्या अग्निशामक दल आणि आपत्कालीन पथकाने तातडीने धाव घेत आग विझवण्याचे आणि विमानातील चालकांसह कर्मचाऱ्यांना सुरक्षित बाहेर काढण्याचे काम सुरू केले आहे. विमानातील जीवितहानी किंवा अपघाताच्या अचूक कारणांबाबत अद्याप वायुसेनेकडून अधिकृत माहिती स्पष्ट झालेली नाही.

प्राथमिक अहवालानुसार, विमानने एअरपोर्टच्या धावपट्टीवर सुरक्षित लँडिंग केले होते. पण त्यानंतर लगेचच त्यात आग लागली अन् धुराचे लोट दिसू लागले. आगी लागल्याची माहिती मिळताच विमानतळावर एकच खळबळ उडाली. हवाई दलाच्या आपत्कालीन पथक तात्काळ घटनास्थळी धावले. त्याशविया अग्निशमन दलाच्या गाड्याही घटनास्थळी दाखल झाल्या. आग नियंत्रणात आणण्यासाठी आणि विमानातील कर्मचारी व इतर कर्मचाऱ्यांना सुरक्षितपणे बाहेर काढण्यासाठी तात्काळ आपत्कालीन बचावकार्य सुरू करण्यात आले. हवाई दलाच्या अधिकाऱ्यांनी विमानातील प्रवाशांच्या प्रकृतीबद्दल किंवा अपघाताच्या नेमक्या कारणाबद्दल अद्याप कोणतेही अधिकृत माहिती दिलेली नाही.

या घटनेनंतर भारतीय हवाई दलाकडून प्रसिद्धीपत्रक जारी करण्यात आले आहे. आज जोरहाटमध्ये भारतीय हवाई दलाच्या एका एएन-३२ विमानाचा अपघात झाला आहे. अधिक माहिती मिळाल्यानंतर पुढील तपशील देण्यात येईल, असे हवाई दलाकडून सांघण्यात आले आहे. मिळालेल्या माहितीनुसार, हवाई दलाचे अधिकारी विमानात लागलेल्या आगीच्या कारणाचा शोध घेत आहे.