राजस्थान येथील भरतपूर जिल्ह्यात नदबई-जनुथर रस्त्यावर एका भरधाव थार गाडीनं दुचाकीला जोरदार धडक दिली. या भीषण अपघातात एकाच कुटुंबातील चार जणांचा मृत्यू झाला. पती-पत्नी आणि दोन लहान मुलांचा मृतांमध्ये समावेश आहे. थारच्या धडकेनंतर दुचाकीला आग लागली. या अपघातानंतर संतापलेल्या जमावानं जीप पेटवून दिली. पोलिसांनी जखमी झालेल्या चालकाला रुग्णालयात उपचारासाठी दाखल केलं आहे. तसेच या घटनेचा तपास सुरू केला आहे.

कुम्हेर पोलीस ठाण्याच्या हद्दीतील देहवा गावातील पती-पत्नी आणि दोन मुलं शनिवारी दुचाकीवरून जात होती. त्याचवेळी नदबई पोलीस ठाण्याच्या हद्दीतील नदबई-जनुथर रस्त्यावर त्यांच्या दुचाकीला वेगाने येणाऱ्या थार जीपने जोरात धडक दिली. ही धडक इतकी भीषण होती की यात दुचाकीवरून अख्खं कुटुंब मृत्युमुखी पडलं.

मिळालेल्या माहितीनुसार, नटवर सिंह (वय ३२), त्याची पत्नी पूजा देवी (वय २८), मुलगी परी (४ वर्षे) आणि दोन वर्षांचा मुलगा दीपू हे दिवाळीनिमित्त सासरी जात होते. नदबई-जनुथर रस्त्यावर लुहासा गावाजवळ एका भरधाव येणाऱ्या थार गाडीने त्यांच्या दुचाकीला जोरदार धडक दिली. ही धडक भीषण होती. त्यामुळे दुचाकीने पेट घेतला.

या घटनेची माहिती मिळाल्यानंतर पोलीस आणि बचाव पथक घटनास्थळी पोहोचले. दुचाकीला लागलेली आग आटोक्यात आणली. अपघातग्रस्त कुटुंबातील चौघांनाही नदबई रुग्णालयात उपचारासाठी नेण्यात आले. पण तोपर्यंत उशीर झाला होता. डॉक्टरांनी तपासून त्या चौघांनाही मृत घोषित केले. या अपघातानंतर स्थानिकांच्या संतापाचा उद्रेक झाला. त्यांनी थार जीप पेटवून दिली. पोलिसांनी तात्काळ आग नियंत्रणात आणली. पण तोपर्यंत जीप खाक झाली होती.

या घटनेत लुहासा येथील रहिवासी असलेला थार चालक नरेश कुमार हा जखमी झाला. त्याला रुग्णालयात दाखल करण्यात आले. त्याच्यावर सध्या उपचार सुरू आहेत. नटवरचं कुटुंब दिवाळी साजरी करण्यासाठी जात असतानाच त्यांच्यावर काळाने घाला घातला. पोलिसांनी या अपघाताच्या घटनेचा तपास सुरू केला आहे. अपघाताच्या कारणांचा शोध घेण्यात येत आहे. एकाच कुटुंबातील चौघांच्या मृत्यूनंतर परिसरावर शोककळा पसरली आहे.