रोहित कदम, साम टीव्ही

हेल्दी, ऑरगॅनिक किंवा झिरो-मैदा... हे शब्द खाद्यपदार्थांच्या पॅकेटवर दिसले की आपण डोळे झाकून ते आपल्या आरोग्यासाठी उत्तम मानतो आणि वाट्टेल ती किंमतही मोजतो. मात्र, आता तुमच्या याच विश्वासाचा गैरफायदा घेऊन नामांकित ब्रँड्स तुमची दिशाभूल करत असल्याचं धक्कादायक वास्तव समोर आलंय.

एकीकडे महाराष्ट्रात अन्न व औषध प्रशासनानं अन्नपदार्थांत भेसळ करणाऱ्यांवर कडक कारवाईची मोहीम राबवली असतानाच, दुसरीकडे राष्ट्रीय पातळीवर 'भारतीय अन्न सुरक्षा आणि मानक प्राधिकरणा'नंही मोठी कारवाई केलीये.

काही कंपन्या आपली उत्पादनं 'झिरो मैदा होल व्हेट ब्रेड' या नावानं विकत असल्याचं 'भारतीय अन्न सुरक्षा आणि मानक प्राधिकरणा'च्या तपासणीत समोर आलंय. तसंच, या ब्रेडमध्ये चक्की फ्रेश पिठासोबत 'व्हीट ग्लूटेन' देखील समाविष्ट आहे. तरीही 'झिरो मैदा' म्हणून याचा प्रचार करणं ग्राहकांना गोंधळात टाकण्यासारखं आहे, असं प्राधिकरणानं म्हटलंय. याशिवाय, कंपनीच्या 'झिरो मैदा पिझ्झा बेस'वरही हरकत घेण्यात आली असून कंपनीकडून नियमांचं उल्लंघन होत असल्याचं प्राधिकरणानं स्पष्ट केलंय.

विशेष म्हणजे, बड्या ब्रँड्सकडून ग्राहकांच्या आरोग्याशी खेळ सुरू असल्यानं भारतीय अन्न सुरक्षा आणि मानक प्राधिकरणानं आता कडक पावलं उचलण्यास सुरुवात केलीये. अशातच आता प्राधिकरणानं ग्राहकांची दिशाभूल केल्याप्रकरणी तब्बल 8 फूड बिजनेस ऑपरेटर्सना कारणे दाखवा नोटिसा बजावल्या आहेत. इतकंच नव्हे तर आता अन्नपदार्थांच्या गुणवत्तेत कसर करणाऱ्या कंपन्यादेखील FSSAIच्या रडारवर आल्या आहेत. त्यामुळे जाहिरातींमधून गुणवत्तेचे दावे करणाऱ्या या बड्या कंपन्यांचे धाबे चांगलेच दणाणलेत.