हरियाणातील गुरूग्राममधून एक खळबळजनक घटना समोर आली आहे. उद्योग मंत्री राव नरबीर सिंह यांच्या सरकारी बंगल्यात एका पोलीस कॉन्स्टेबलनं आत्महत्या केली आहे. पोलीस कॉन्स्टेबल गार्ड रूममध्ये तैनात होते. एका सहकाऱ्यानं त्यांना खोलीत बेशुद्ध अवस्थेत पाहिलं. त्यांनी मंत्री आणि इतर पोलिसांना याची माहिती दिली. पोलीस कॉन्स्टेबलला तातडीने रूग्णालयात नेण्यात आले. परंतु, डॉक्टरांनी त्यांना मृत घोषित केले.

जगबीर सिंह (वय वर्ष ४९) असे मृत पोलीस कॉन्स्टेबल यांचे नाव आहे. ते झज्जर जिल्ह्यातील सुखपुरा गावचे रहिवासी होते. पोलिसांनी दिलेल्या माहितीनुसार, पोलीस कॉन्स्टेबल जगबीर सिंह हे राव नरबीर सिंह यांच्या बंगल्याच्या प्रवेशद्वारावर सुरक्षा ड्युटीवर कार्यरत होते. प्राथमिक तपासात ही आत्महत्या असल्याचं दिसून आलं आहे.

दरम्यान, घटनास्थळावरून कोणतीही सुसाईड नोट सापडलेली नाही. ही घटना सिव्हिल लाईन्स परिसरात घडली आहे. पोलिसांनी दिलेल्या माहितीनुसार, ही घटना मध्यरात्री अडीच वाजता घडली आहे.

एसएचओ कृष्ण कुमार म्हणाले की, 'आम्हाला संशय आहे की, कॉन्स्टेबलनं विषारी पदार्थ खाल्ले असावे. यामुळे त्याचा जागीच मृत्यू झाला असावा. पोस्टमॉर्टम रिपोर्ट समोर आल्यानंतरच मृत्यूमागचं कारण समोर येईल'. दरम्यान, मृताच्या कुटुंबाने अद्याप यासंदर्भात लेखी तक्रार दाखल केलेली नाही. कुटुंबाकडून दाखल झालेल्या तक्रारीनंतरच पुढील कारवाई केली जाईल, अशी माहिती पोलिसांना दिली.