हरियाणाच्या नूंहच्या फिरोजपूरच्या झिरकामध्ये दोन गटात झालेल्या हाणामारीची घटना घडलीय. दोन्ही बाजूंनी दगडफेक झाली. तर कोणी कोणावर काठ्यांनी मारहाण केली. काहींनी एकमेकांवर काचेच्या बाटल्यांनी हल्ला केला. दोन्ही बाजूंमध्ये झालेल्या हिंसाचारात सुमारे १० जण जखमी झालेत. हिंसक हाणामारीची माहिती पोलिसांना मिळताच, पथक घटनास्थळी पोहोचले आहे. पोलीस कर्मचारी परिस्थितीवर नियंत्रण मिळवत आहे. दरम्यान पोलिसांनी संपूर्ण परिसरात नाकाबंदी केलीय.

दगडफेक आणि काचेच्या बाटल्यांनी हल्ला जेव्हा झाला त्यावेळी १० जण जखमी झालेत. दंगलखोरांनी परिसरात अनेक ठिकाणी जाळपोळ केली. यात काही दुकाने आणि वाहने पेटवून देण्यात आली आहेत. सुरुवातीला पोलिसांनी घटनास्थळी पोहोचून शांतता प्रस्थापित करण्याचा प्रयत्न केला परंतु परिस्थिती नियंत्रणाबाहेर गेल्यावर पोलिसांना इतर पोलीस ठाण्यांची मदत घ्यावी लागली.

पोलिसांकडून मिळालेल्या माहितीनुसार, फिरोजपूर झिरका येथील हिंसाचाराच्या ठिकाणी प्रत्येक कोपऱ्यावर पोलिस तैनात करण्यात आले आहेत. संपूर्ण परिसर हा छावणीत रूपांतरित झालाय. डीएसपी दर्जाचे अधिकारीही घटनास्थळी उपस्थित आहेत. याप्रकरणी माहिती देताना सरपंच राम सिंग सैनी यांनी सांगितले की, फिरोजपूर झिरकाहून त्यांच्या गावाकडे जाणाऱ्या रस्त्यावर एका स्थानिक माणसाचा मुलगा, ज्याचे नाव इसरा आहे तो रस्त्याच्या मध्यभागी आपली कार घेऊन उभा होता. स्थानिक रहिवासी समय सिंग हा तेथे गेला. तेव्हा समयने इसराला गाडी हलवण्यास सांगितले तेव्हा दोघांमध्ये वाद झाला.

वाद सुरू असताना एका तरुणाने गाडीतून बाहेर येऊन काचेच्या बाटलीने समयच्या डोक्यावर वार केले. यानंतर वाद वाढतच गेला. या वादादरम्यान एका मोटारसायकल पेटवण्यात आली. एका दुकानालाही आग लावण्यात आली. सरपंच राम सिंह सैनी यांनी आरोप केला आहे की दुसऱ्या बाजूच्या लोकांनी त्यांच्यावर दगडफेक केली आणि स्वतः दुकानाला आग लावली.