Nanded Police : पोलीस निरीक्षकाकडून होमगार्डला मारहाण; फोटो झाले व्हायरल

संजय सूर्यवंशी 

नांदेड : नांदेड शहरात कर्तव्यावर असणाऱ्या एका होमगार्डला वजीराबाद पोलीस निरीक्षकाकडून मारहाण करण्यात आल्याची तक्रार समोर आली आहे. कर्तव्य बजावत असताना कामात कसूर केल्यावरून मारहाण करण्यात आल्याचा आरोप करण्यात आला आहे. दरम्यान मारहाण झाल्याने पाठीवर तीन वळ उमटले असल्याचे फोटो सोशल मीडियावर व्हायरल झाले असून या प्रकरणी चौकशी सुरु आहे. 

नांदेड शहरातील तिरंगा चौकात वाहतूक सुरळीत करण्याची जबाबदारी गृहरक्षक दलाचे जवान कैलाश गंगाराम हिंगोले यांच्याकडे सोपविण्यात आली होती. त्यानुसार कैलास हिंगोले हे कर्तव्य बजावत असताना आपला कर्तव्यात कुचराई करत असल्याप्रकरणी वजीराबाद ठाण्याचे पोलीस निरीक्षक परमेश्वर कदम यांनी त्यांना मारहाण केल्याचा आरोप करण्यात आला आहे. या प्रकरणी हिंगोले यांनी तक्रार देखील केली आहे. 

चौकशीचे आदेश 

होमगार्डच्या पाठीवर तीन वळ आल्याचे फोटो समजमाध्यमांवर व्हायरल झाले आहेत. दरम्यान या प्रकरणानंतर हिंगोले यांच्याकडून तक्रार करण्यात आली असून या प्रकरणाची चौकशी आता अप्पर पोलीस अधीक्षक तथा गृहरक्षक दलाचे जिल्हाप्रमुख सुरज गुरव यांच्याकडे सोपविण्यात आली आहे. याबाबतची माहिती पोलीस अधीक्षक अबिनाश कुमार यांनी दिली.

कृषी पंप चोरणारे ५ जण पोलिसांच्या ताब्यात
नाशिक : नाशिकच्या सटाणा (बागलाण) तालूक्यात शेतकऱ्यांचे कृषी पंप चोरून नेणाऱ्या पाच जणांच्या टोळीच्या मुसक्या आवळण्यात पोलिसांना यश आले आहे. तालूक्यातील लखमापूर, धांद्री, अजमेर सौंदाणे, ब्राम्हणगाव या परिसरातून शेतकऱ्यांच्या शेतातून इलेक्ट्रीक पंप, जलपरी चोरीच्या घटनेत वाढ झाली होती. सटाणा पोलिसात चोरीच्या तक्रारी वाढल्याने पोलिसांनी पथक तयार करुन पाच जणांच्या टोळीला ताब्यात घेत ११ इलेक्ट्रीक पंप व जलपरी असा १ लाख १३ हजार रुपयांच्या हजार रुपये किमतीचा मुद्देमाल जप्त केला.