हरियाणाच्या रोहतकमधये सायबर सेलमध्ये कार्यरत असलेल्या सहायक पोलीस उपनिरीक्षकांनी स्वत:वर गोळ्या झाडून आयुष्य संपवलं आहे. सहायक पोलीस उपनिरीक्षकांनी आत्महत्या करण्याआधी ३ पानी चिठ्ठी लिहिली. तसेच एका व्हिडिओ देखील रेकॉर्ड केला. हरियाणा पोलीस दलात एकापाठोपाठ एक आत्महत्या झाल्याने एकच खळबळ उडाली आहे.

सहायक पोलीस उपनिरीक्षक संदीप लाठर असे आत्महत्या केलेल्या पोलीस अधिकाऱ्याचे नाव आहे. सहायक पोलीस उपनिरीक्षकांनी आत्महत्या करण्याआधी लिहिलेल्या ३ पानी चिठ्ठीत आयपीएस अधिकारी वाय पूरन कुमार यांच्यावर गंभीर आरोप केला आहे . 'वाय पूरन कुमार भ्रष्टाचारी होते. ते जातीयवादाचा आधार घेत व्यवस्था हायजॅक करण्याचा प्रयत्न करत होते.

संदीप लाठर यांनी लिहिलेल्या चिठ्ठीत पुढे म्हटलं की, मी भ्रष्ट व्यवस्थेविरोधात बलिदान दिलं आहे. त्यांनी पूरन कुमार यांच्या कुटुंबाविरोधात निष्पक्ष चौकशीची मागणी आहे. सूत्रांच्या माहितीनुसार, सहायक पोलीस उपनिरीक्षक संदीप लाठर हे या प्रकरणाचा तपास करत होते. त्यांचा आत्महत्येनंतर मृतदेह ताब्यात घेऊन पोस्टमार्टमसाठी पाठवण्यात आला आहे. तसेच पोलिसांनी या प्रकरणाचा पुढील तपास सुरु केला आहे.

संदीप लाठर यांनी काही दिवसांपूर्वी आयपीएस पूरन यांच्या टीममधील सुशील कुमार यांना अटक केली होती. सुशील यांच्यावर दारु व्यावसायिकांकडून महिन्याला वसुली केल्याचा आरोप होता. याच प्रकरणाच्या तपासाची जबाबदारी संदीप लाठर यांच्यावर दिली होती. या प्रकरणात आयपीएस पूरन कुमार यांची पत्नी आयएएस अधिकाऱ्यांनी खळबळजनक गंभीर आरोप केला होता. भ्रष्टाचाराच्या प्रकरणात माझ्या पतीला अडवण्याचा प्रयत्न केला जात होता, असा आरोप पूरन कुमार यांच्या पत्नीकडून करण्यात आला आहे.