वाराणसी: ज्ञानवापी मशीद (Gyanvapi Masjid Case) प्रकरणी आज, सोमवारी वाराणसी जिल्हा न्यायालयात सुनावणी पूर्ण झाली आहे. न्यायालयाने आपला निर्णय उद्यापर्यंत राखून ठेवला आहे. आज न्यायालयात जवळपास ४५ मिनिटे सुनावणी झाली. दोन्ही पक्षांच्या वतीने युक्तिवाद करण्यात आला. त्यानंतर न्यायालयाने (varanasi district court) आपला निर्णय उद्यापर्यंत राखून ठेवला आहे. आता या प्रकरणी उद्या सुनावणी झाल्यानंतर न्यायालय निर्णय देऊ शकते. आजपासून जिल्हा न्यायालयात सुनावणी सुरू झाली असून, त्या पार्श्वभूमीवर सुरक्षा व्यवस्था कडेकोट ठेवण्यात आली होती. शुक्रवारी सुप्रीम कोर्टाने (Supreme Court) या प्रकरणात सुनावणीसंबंधी जिल्हा न्यायाधीशांना दिलेल्या आदेशात म्हटलं होतं की, न्यायालयात केवळ या प्रकरणाशी संबंधित वकील उपस्थित राहतील. त्यामुळे आज सुनावणीवेळी वादी आणि प्रतिवादी पक्षाचे एकूण २३ जण उपस्थित होते. (gyanvapi masjid case Hearing)

ज्ञानवापी मशीद प्रकरणात आजपासून वाराणसीच्या जिल्हा न्यायालयात सुनावणी सुरू झालेली आहे. उद्याही न्यायालयात सुनावणी होणार आहे. न्यायालयाकडून उद्या या प्रकरणात निर्णय दिला जाण्याची शक्यता आहे. न्यायालयाने यावरील आपला निर्णय उद्यापर्यंत सुरक्षित ठेवला आहे. सुप्रीम कोर्टाच्या आदेशानंतर सुनावणीवेळी न्यायालय हिंदू आणि मुस्लीम पक्षकारांची मते जाणून घेणार आहे. या प्रकरणात एकूण तीन याचिका न्यायालयात दाखल करण्यात आल्या आहेत. त्यात दोन्ही पक्षकारांकडून वेगवेगळ्या मागण्या करण्यात आल्या आहेत.

आठ आठवड्यांत सुनावणी पूर्ण करण्याचे सुप्रीम कोर्टाने दिले आदेश

सुप्रीम कोर्टाने शुक्रवारी या प्रकरणात सुनावणी घेतानाच, जिल्हा न्यायाधीशांसमोर या प्रकरणाची सुनावणी होईल असे आदेश दिले. तसेच आठ आठवड्यांत सुनावणी पूर्ण करण्याचे आदेश जिल्हा न्यायालयाला दिले. दरम्यान, आज जिल्हा न्यायालयाचे न्यायाधीश डॉ. अजय कुमार विश्वेस यांनी निर्देश दिले होते. सुनावणीवेळी कोर्टरूममध्ये केवळ या प्रकरणाशी संबंधित वकील उपस्थित राहतील, असे त्यांनी आदेशात म्हटले होते. दुसरीकडे, आजपासून सुनावणी सुरू होणार असल्याने कोर्टाबाहेर सुरक्षाव्यवस्था वाढवण्यात आली होती.