उत्तर प्रदेशच्या सहारनपूरच्या गावातून खळबळजनक घटना उघडकीस आली आहे. एका अशोक नावाच्या व्यक्तीच्या घरात ५ जणांचे मृतदेह आढळले. पाचही जण एकाच कुटुंबाचे सदस्य होते. या पाचही जणांची डोक्यात गोळ्या झाडून हत्या केल्याचे प्राथमिक माहितीतून समोर आलं आहे. पोलिसांनी घटनास्थळी पोहोचून तपास सुरू केला आहे.

पोलिसांनी मृतदेह ताब्यात घेऊन शवविच्छेदनासाठी रुग्णालयात पाठवण्यात आले आहे. पोलिसांनी नातेवाईकांना गोळ्या झाडून व्यक्तीने आत्महत्या केल्याचा संशय व्यक्त केला आहे. पंरतु पोलीस हे हत्या आणि आत्महत्या या दोन्ही बाजूने तपास करत आहेत. या घटनेने संपूर्ण गावात खळबळ उडाली आहे.

मिळालेल्या माहितीनुसार, हत्या झालेल्या मृतांमध्ये एक पुरुष, दोन महिला आणि दोन लहान मुलांचा समावेश आहे. मीन अशोक (४०),पत्नी अंजिता (३७), आई विद्यावती (७०), दोन मुले कार्तिक(१६)-देव (१३) अशी मृतांची ओळख समोर आली आहे. अशोक आणि त्यांची पत्नी अंजिताचं मृतदेह फरशीवर आढळला. विद्यावती आणि दोन्ही मुलांचे मृतदेह बेडवर आढळले. पाचही जणांचे मृतदेह एकाच खोलीत आढळले. अशोक यांनी आई-बायको आणि मुलांना गोळ्या झाडून स्वत:वर गोळी झाडून आत्महत्या केल्याचा पोलिसांना संशय आहे

पोलिसांना मिळालेल्या प्राथमिक माहितीनुसार, अशोक हे कर्जबाजारी झाले होते. या कर्जावरून त्यांच्या घरात वाद व्हायचे. या मानसिक तणावातून अशोक यांनी टोकाचं पाऊल उचलल्याचं बोललं जात आहे. त्याचबरोबर कुटुंबाबाहेर व्यक्तीने येऊन पाच जणांची हत्या केल्याचाही संशय पोलिसांनी व्यक्त केला आहे. पोलीस दोन्ही बाजूने तपास करत आहेत. पोलीस आता शेजारी आणि नातेवाईकांची चौकशी करणार आहे.

शेजाऱ्यांनी दिलेल्या माहितीनुसार, अशोक हे तहसील कार्यालयात नोकरीला होते. वडिलांच्या निधनानंतर अशोक यांना नोकरी मिळाली होती. अशोक यांचा मुलगा खासगी शाळेत इयत्ता ९ वीमध्ये शिक्षण घेत होता. तर दुसरा मुलगा कार्तिक हा इयत्ता १० वीमध्ये होता. कुटुंब अगदी शांत होतं. त्यांच्या घरात कधीच वाद झाल्याचे ऐकलं नव्हतं'.