देशभरात बोगस औषधांची विक्री करणाऱ्या रॅकेटचा पर्दाफाश झालाय. कॅन्सरसारख्या दुर्धर आजाराची बोगस औषधं विकून रुग्णांच्या जीवाशी खेळ सुरू होता. हा बोगस औषध विक्रीचा घोटाळा कुठे उघडकीस आलाय? कोण-कोणत्या राज्यांत या औषधांची विक्री सुरू होती? पाहूयात यावरचा हा रिपोर्ट.

ज्या औषधांवर विश्वास ठेवून माणूस मरणाच्या दारातून परत येण्याची वाट पाहतो. त्याच जीवनाचा आधार असणाऱ्या औषधांद्वारे थेट 50 टक्के सवलतीत मृत्यू विकला जातो. होय कॅन्सरसारख्या गंभीर आजारांवर आणि आयसीयूमध्ये लागणाऱ्या जीवनरक्षक औषधांच्या नावाखाली बनावट औषधांचा काळाबाजार समोर आलाय.

बंगळुरूमधल्या तब्बल ९० हून अधिक रुग्णालये, क्लिनिक्स आणि मेडिकल स्टोअर्समध्ये या बनावट औषधांची डिलिव्हरी झाली असून, लाखो निष्पाप रुग्णांच्या जिवाशी खेळ खेळला गेलाय. तब्बल ५० टक्क्यांच्या भरघोस डिस्काउंटचे आमिष दाखवून बनावट औषध विकण्याची ही मोडस ऑपरेंडी कशी होती पाहा.

रुग्णालयांना आणि मेडिकल स्टोअर्सना ५० टक्के डिस्काउंट देऊन बनावट औषधे पुरवण्यात आली. कालबाह्य झालेल्या औषधांवर नवीन कंटेनर आणि नामांकित कंपन्यांचे बनावट लेबल लावून लोकांना गंडवण्यात आलं. पोलिसांनी बिदादी आणि दोड्डेरी येथील फार्महाऊसवर छापा मारून ५ कोटींचा साठा जप्त केला या रॅकेटचं महाराष्ट्र, तमिळनाडू आणि हरियाणात नेटवर्क असुन १५ एजंट्सद्वारे या नकली औषधांचे वितरण करण्यात आलं. गेल्या ५ वर्षांपासून सुरू असलेल्या या रॅकेटचा मुख्य सूत्रधार प्रशांत अजूनही पोलिसांना चकवा देतोय.

हा नुसता औषधांचा घोटाळा नाही, तर हा रुग्णांच्या जीवाशी मांडलेला खेळ आहे. कॅन्सरसारख्या गंभीर आजाराने आधीच खचलेल्या रुग्णांना औषधांच्या नावाखाली विषारी केमिकल पाजणाऱ्या या नराधमांवर कडक कारवाईची मागणी आता वकीलांनीही उचलून धरलीये.

पैशांच्या हाव्यासापोटी निष्पाप रुग्णांची फसवणूक करणाऱ्या नराधमांना कठोरात कठोर शिक्षा तर झालीच पाहिजे. मात्र रुग्णांनीही डिस्काऊंटच्या मोहाला बळी न पडता औषधांची शाहनिशा करणं गरजेचं आहे. कारण बंगळुरूमध्ये घडलेलं हे कांड उद्या तुमच्या-आमच्या घरापर्यंत पोहोचायला वेळ लागणार नाही.