स्वातंत्र्यदिनानिमित्त रांचीमध्ये जयपाल सिंह मुंडा स्टेडियममध्ये तिरंगा यात्रेचे आयोजन करण्यात आले होते. या यात्रेत सहभागी सहभागी होण्यासाठी झारखंड लोकतांत्रिक क्रांतिकारी मोर्चाचे नेते देवेंद्र नाथ महतो हे रुग्णालयातून बाहेर पडण्याच्या तयारीत होते. मात्र, त्याचवेळी पोलिसांनी त्यांना बाहेर जाण्यापासून रोखले. पोलिसांनी आपल्यासोबत धक्काबुक्की केल्याचा आरोप महतो यांनी केला आहे.

महतो यांनी सांगितले की, जो पर्यंत आपल्याला रुग्णालयातून बाहेर जाण्याची परवानगी दिली जात नाही, तो पर्यंत आपण आपल्या रूमच्या गेटवरच बसून राहणार असून उपचारही करून घेणार नाही. देवेंद्र नाथ महतो यांची आमरण उपोषणाची आज 14 वा दिवस आहे. त्यांनी 2 ऑगस्टपासून उपोषण सुरू केले आहे. विधानसभेला घेराव घातल्यानंतर त्यांना रुग्णालयात दाखल करण्यात आले होते.

स्वातंत्र्यदिनानिमित्त तिरंगा हातात घेऊन बाहेर जाण्याचा प्रयत्न करत असताना पोलिसांनी त्यांचा मार्ग अडवला. त्यांना रुग्णालयातच विश्रांती घेण्यास सांगण्यात आले. या घटनेचा व्हिडिओ देखील समोर आला असून, त्यामध्ये महतो बाहेर जाण्याचा प्रयत्न करताना आणि पोलिस त्यांना अडवताना दिसत आहेत. यावेळी महतो यांनी पोलिसांवर जबरदस्तीने रुग्णालयात डांबून ठेवण्याचा आरोप केला. तुम्ही मला आत ठेवून माझा जीव घेत आहात असा आरोप त्यांनी केला. महतो यांनी तिरंगा यात्रेत सहभागी होण्याची इच्छा व्यक्त केल्यानंतर त्यांच्या रुग्णालयातील खोलीबाहेर मोठ्या संख्येने पोलिसांचा बंदोबस्त तैनात करण्यात आल्याचेही त्यांनी सांगितले.

दरम्यान, महतो यांनी 'एक्स'वर एक व्हिडिओ शेअर केला आहे. या व्हिडिओमध्ये पोलिस त्यांना जबरदस्तीने पकडताना दिसत आहेत. १४ दिवसांपासून उपोषणावर असलेल्या आपल्यासोबत पोलिसांनी धक्काबुक्की केली, असा आरोप महतो यांनी केला. तसेच त्यांच्यासोबत असलेल्या कार्यकर्त्यांनाही पोलिसांनी मारहाण केल्याचा दावा त्यांनी केला.