दिल्ली पोलिसांत नवीन पोलिस आयुक्त अनुराग कुमार यांनी कार्यभार स्वीकारल्यानंतर अवघ्या दोन आठवड्यांत मोठे प्रशासकीय बदल पाहायला मिळाले आहेत. सलग दोन दिवसांत 40 पोलीस ठाण्याच्या अधिकाऱ्यांचे बदल्या करण्यात आले आहेत. इतक्या कमी कालावधीत झालेल्या या मोठ्या बदल्यांमुळे पोलीस दलात मोठी खळबळ उडाली आहे.

दिल्ली पोलीस मुख्यालयाने जारी केलेल्या आदेशानुसार गुरुवारी ३० आणि शुक्रवारी १० अशा एकूण ४० अधिकाऱ्यांच्या बदल्या करण्यात आल्या. बदली करण्यात आलेल्या सर्व अधिकाऱ्यांना तत्काळ नवीन ठिकाणी हजर होऊन संबंधित जिल्हा किंवा युनिटच्या पोलीस उपायुक्तांना (DCP) अहवाल देण्याचे निर्देश देण्यात आले आहेत.

कमी वेळेत मोठा बदल, पोलीस दलात चर्चांना उधाण

पोलीस विभागातील सूत्रांनी दिलेल्या माहितीनुसार, नवीन पोलिस आयुक्तांनी कार्यभार स्वीकारल्यानंतर इतक्या कमी कालावधीत एवढ्या मोठ्या प्रमाणात बदली होणे असामान्य आहे. त्यामुळे या निर्णयाने पोलीस दलात चर्चांना उधाण आले आहे. या मोठ्या प्रशासकीय बदलामागील अधिकृत कारण अद्याप दिल्ली पोलिसांकडून स्पष्ट करण्यात आलेले नाही. त्यामुळे या निर्णयाबाबत विविध तर्कवितर्क लावले जात आहेत. काही अधिकारी याला नवीन कार्यपद्धतीची सुरुवात मानत आहेत, तर काहींना हा निर्णय नियमित प्रशासकीय प्रक्रियेपेक्षा वेगळा वाटत आहे.

या बदलांदरम्यान महरौली, फतेहपूर बेरी, मयूर विहार, गोविंदपुरी आणि सीआर पार्क यांसारख्या महत्त्वाच्या ठाण्यांमध्ये कार्यरत असलेल्या काही एसएचओंना (SHO) सुरक्षा आणि पीसीआरसारख्या नॉन-फील्ड युनिटमध्ये बदली करण्यात आली आहे. यामुळेही विभागात चर्चेला अधिक उधाण आले आहे.