Delhi-Mumbai Expressway Update News : दिल्ली मुंबई एक्सप्रेसवेवर प्रवाशांनी खचाखच भरलेली बस आणि केमिकल टँकरचा भीषण अपघात झालाय. या अपघातात ४ जणांचा जागीच मृत्यू झाला तर ३० जण जखमी असल्याची माहिती मिळत आहे. दिल्ली-मुंबई एक्सप्रेसवेवर राजस्थानमधील अलवर येथे भयंकर अपघात झाला. अपघातानंतर महामार्गावर मोठ्या प्रमाणात वाहतूककोंडी झाली होती. पोलिसांनी तात्काळ घटनास्थळावर धाव घेत मदतकार्य केले. पोलिसांनी अपघातग्रस्त वाहने बाजूला केली. जखमी लोकांना तात्काळ जवळच्या रूग्णालयात उपचारासाठी दाखल केले. जखमींपैकी काहींची प्रकृती चिंताजनक असल्याचे स्थानिकांनी सांगितलेय.

अलवर जिल्ह्यात दिल्ली-मुंबई एक्सप्रेसवेवर एका प्रवासी बसची केमिकलने भरलेल्या ट्रकसोबत भीषण धडक झाली. या अपघातात ४ जणांचा मृत्यू झाला असून ३० हून अधिक जण जखमी झाले आहेत. जखमींना रुग्णालयात दाखल करण्यात आले आहे. ही घटना दिल्ली-मुंबई द्रुतगती मार्गावरील चॅनल १०० इंटरचेंज पुलाजवळ घडली. रायथी पोलीस ठाण्याचे एसएचओ बनय सिंग यांनी सांगितले की, केमिकलने भरलेला टँकरची प्रवासी बससोबत धडक झाल्याने ४ जणांचा मृत्यू झालाय.

अपघाताची माहिती मिळताच, एनएचएआयचे एक पथक घटनास्थळी दाखल झाले आणि त्यांनी सर्व जखमींना रुग्णवाहिकेने पिनान येथील आरोग्य केंद्रात नेले. डॉक्टरांनी प्रथमोपचार केले आणि त्यानंतर गंभीर जखमींना पुढील उपचारांसाठी पाठवले. बस आणि टँकरची धडक इतकी भीषण होती की बसमधील ३० प्रवासी जखमी झाले. बस चालक, एक महिला आणि २ मुलाचा जागीच मृत्यू झाला. पोलिसांनी मृतदेह पोस्टमार्टमसाठी जवळच्या रूग्णालयात पाठवले आहेत.

अपघात झाल्यानंतर जवळपास दोन तासांनी पोलीस घटनास्थळी पोहोचल्याचा आरोप अपघातामधील जखमींनी केलाय. पोलीस उशिरा आल्याने स्थानिक आणि प्रवाशांमध्ये संताप निर्माण झाला. अपघाताचे नेमके कारण अद्याप समजलेले नाही. पोलिसांकडून याप्रकरणाचा तपास केला जात आहे. सूत्रांच्या माहितीनुसार, अतिवेग आणि निष्काळजीपणामुळे अपघात झाला असावा असा अंदाज आहे. पोलिसांनी घटनास्थळाचा पंचनामा केला असून तपास सुरू केला आहे.