मोठी बातमी! महादेव दर्शनाचा काळाबाजार, त्र्यंबकेश्वर देवस्थानचे विश्वस्त पुरुषोत्तम कडलगला अटक

Nashik tryambakeshwar temple trustee arrested : नाशिकमधील प्रसिद्ध ज्योतिर्लिंग असलेल्या त्र्यंबकेश्वरमधून एक मोठी बातमी समोर आली आहे. महादेवाच्या दर्शनाचा काळाबाजार केल्याप्रकरणी त्र्यंबकेश्वर मंदिर संस्थानचे विश्वस्त पुरुषोत्तम कडलग यांना पोलिसांनी अटक केली आहे. मंदिर प्रशासनातील एका जबाबदार पदावरील व्यक्तीलाच अटक झाल्याने नाशिक आणि संपूर्ण परिसरात मोठी खळबळ उडाली आहे. पुरुषोत्तम कडलग हे नाशिकमधील राष्ट्रवादी काँग्रेस (शरद पवार) पक्षाचे कार्यकर्ते आहेत. त्यांच्याकडे पक्षाचे नाशिकमधील महत्त्वाचे पद असल्याची माहिती समोर आली आहे

काही दिवसांपूर्वी त्र्यंबकेश्वर मंदिरात दर्शनासाठी आलेल्या एका भाविकाकडून व्हीआयपी दर्शनाच्या नावाखाली ३ हजार रुपये उकळण्यात आल्याचा प्रकार समोर आला होता. या प्रकरणी दोन दिवसांपूर्वीच पुरुषोत्तम कडलग यांचा पुतण्या याच्या विरोधात गुन्हा दाखल करण्यात आला होता. या प्रकरणाचा तपास करत असताना या काळाबाजारामध्ये विश्वस्त पुरुषोत्तम कडलग यांचाही सहभाग असल्याचे प्राथमिक तपासातून समोर आले. त्यानंतर त्र्यंबकेश्वर पोलिसांनी तातडीने पावले उचलत कडलग यांना बेड्या ठोकल्या.

मंदिर संस्थानच्या विश्वस्तानेच अशा प्रकारे दर्शनाचा बाजार मांडल्याने भाविकांमध्ये संताप व्यक्त केला जात आहे. या रॅकेटमध्ये अजून कोणाचे हात गुंतलेले आहेत का? याचा तपास पोलीस करत आहेत. त्र्यंबकेश्वर मंदिरात दर्शनासाठी येणाऱ्या भाविकांची लूट होत असल्याच्या तक्रारी वारंवार येत असतात. मात्र, आता थेट विश्वस्तावरच कारवाई झाल्याने मंदिर प्रशासनातील गैरव्यवहार चव्हाट्यावर आले आहेत.