दिल्लीतून धक्कादायक बातमी समोर आली आहे. एका तरुणीने हॉटेलच्या बाल्कनीमधून उडी मारून आत्महत्येचा प्रयत्न केला. यावेळेस तिच्यासोबत हॉटेलमध्ये तिचा बॉयफ्रेंडही असल्याचं समोर आलं आहे. बॉयफ्रेंडने लग्नाला नकार दिल्याने तरुणीने आत्महत्येच पाऊल उचललं असल्याचं धक्कादायक कारण समोर आलं आहे. याप्रकरणी पोलीस तपास सुरु असून पोलिसांनी बॉयफ्रेंडविरोधात गुन्हा दाखल केला आहे. या भयानक घटनेचा व्हिडिओ सोशल मीडियावर वेगाने व्हायरल होत आहे.

मिळालेल्या माहितीनुसार,तरुणीने आणि तिच्या बॉयफ्रेंडने व्हॅलेंटाईन डे च्या आदल्या दिवशी हॉटेलची रूम बुक केली होती. दोघेही ठराविक हॉटेलमध्ये दिलेल्या रूममध्ये गेले. या दरम्यान मुलीने तिच्या प्रियकराला लग्नाबद्दल विचारले असता बॉयफ्रेंडने आडमुठेपणा केला.

तरीही तरुणी तिच्या प्रियकरावर लग्न करण्यासाठी दबाव आणत होती. मुलाने स्पष्टपणे नकार दिल्यावर दोघांमध्ये जोरदार वाद झाला. या रागाच्या भरात तरुणी तावातावाने हॉटेलच्या बाल्कनीत गेली. त्या बाल्कनीतून उडी मारली. नशीब बलवत्तर म्हणून हॉटेल रूमच्या खाली असलेल्या इलेक्ट्रिकल दुकानातील एका कर्मचाऱ्याला मुलगी खाली पडत असल्याचं दिसलं.

त्याने सतर्कता राखून घटनास्थळी धावला. त्याने दुकानातून काही रिकामे पुठ्ठे काढले आणि तरुणी जिथे पडणार होती तिथे रस्त्यावर पसरवले. पुठ्ठ्यांच्या खोक्यांनी तिला थेट काँक्रीटच्या फरशीवर आदळण्यापासून रोखले आणि तिचा जीव वाचवला. याप्रकरणी पोलिसांनी घटनास्थळी धाव घेत तरुणाला ताब्यात घेतले आहे. तसेच तरुणीवर दिल्लीतील रुग्णालयात उपचार सुरु असून ती बेशुद्ध अवस्थेत आहे.