दादरा आणि नगर हवेली केंद्रशासित प्रदेशातील सेल्वस येथे शनिवारी सकाळी एक भीषण दुर्घटना घडली आहे. देमानी रोडवरील एका गोदामात नायट्रोजन गॅस सिलेंडर भरत असताना मोठा स्फोट झाला असून यात ४ जणांचा मृ्त्यू झाला आहे, तर पाचहून अधिक जण गंभीर जखमी झाले. सर्व जखमींना तात्काळ उपचारासाठी जवळच्या रुग्णालयात दाखल करण्यात आले.
मिळालेल्या माहितीनुसार, शनिवारी सकाळी गोदामात कामगार नायट्रोजन वायूचे सिलिंडर भरत होते. अचानक एका सिलिंडरचा स्फोट झाला. हा स्फोट इतका भीषण होता की त्यामुळे गोदामाच्या पूर्णपणे जमिनीदोस्त झाले. आजूबाजूच्या परिसरातही जोरदार कंपने जाणवल्याने स्थानिकांमध्ये दहशत पसरली.
स्थानिकांच्या मते, स्फोटाचा आवाज ३० मीटर अंतरापर्यंत ऐकू आला. जवळून जाणारी शाळकरी मुले आणि स्थानिक रहिवासी मोठ्या आवाजाने घाबरले. काही लोकांना तर भूकंपासारखे धक्के जाणवल्याचेही सांगितले. या घटनेची माहिती मिळताच पोलीस दल आणि अग्निशमन दल घटनास्थाळी दाखल झाले. बचाव आणि मदतकार्य तात्काळ सुरू करण्यात आले. ढिगाऱ्याखाली अडकलेल्यांना बाहेर काढून रुग्णालयात दाखल करण्यात आले. प्राथमिक अहवालानुसार, मृतांमध्ये गोदामाच्या व्यवस्थापकाचा समावेश आहे.
मिळालेल्या माहितीनुसार, पोलीस आणि प्रशासकीय अधिकारी घटनास्थळी दाखल झाले आहेत. प्राथमिक तपासात सुरक्षा मानकांचे उल्लंघन झाल्याची शक्यता वर्तवण्यात आली आहे. प्रशासनाने संपूर्ण घटनेची निष्पक्ष चौकशी करण्याचे आदेश दिले असून, सिलेंडर भरण्याच्या प्रक्रियेदरम्यान झालेल्या निष्काळजीपणाच्या व्याप्तीची चौकशी करत आहे, ज्यामुळे हा मोठा अपघात घडला.