तुम्हालाही घसा खवखवला किंवा घसा दुखला की लगेच खोकल्याचं सिरप आठवतं बरोबर ना. यापूर्वी ते सिरप मेडिकल स्टोअरमध्ये जाऊन थेट खरेदी करता येत होतं, मात्र आता त्याबाबत मोठा निर्णय घेण्यात येणार आहे. या औषधांसाठी डॉक्टरांचे प्रिस्क्रिप्शन अनिवार्य करण्यात आले आहे. त्यामुळे नागरिकांना आता कोणतेही सिरप खरेदी करण्यापूर्वी डॉक्टरांचा सल्ला घेणे आवश्यक ठरणार आहे.

मध्य प्रदेशातील कफ सिरपमुळे एकूण २२ मुलांचा मृत्यू झाला. त्याच वेळी, राजस्थानमध्येही खोकल्याचे औषध प्यायल्याने मुलांचा मृत्यू झाला. त्यानंतर देशभरात एकच खळबळ उडाली आणि त्यानंतर सरकारने खोकल्याच्या औषध विक्रीवर बंदी घातली. त्यानंतर आता केंद्रीय आरोग्य आणि कुटुंब कल्याण मंत्रालयाने ९ जून रोजी यासंदर्भातील अधिकृत सूचना जारी केली आहे.

या निर्णयानुसार, सिरप स्वरूपातील औषधांची ‘ओव्हर द काउंटर’ (OTC) म्हणजेच डॉक्टरांच्या चिठ्ठीशिवाय होणारी विक्री बंद करण्यात आली आहे. सरकारने यापूर्वी डिसेंबर २०२४ मध्ये यासंबंधी अधिसूचना जारी केली होती. त्यानंतर आता हा निर्णय अधिकृतपणे लागू करण्यात आला आहे. भारतातील ड्रग्ज नियमांनुसार, १९४५ मध्ये महत्त्वाची दुरुस्ती करण्यात आली आहे. याअंतर्गत ‘शेड्युल K’ मधील काही सवलतींमध्ये बदल करण्यात आला आहे. त्यानुसार सिरप सारख्या औषधांना मिळणारी सूट काढून घेण्यात आली आहे. यामुळे कफ सिरप आणि इतर सिरप सारखी औषधे आता पूर्वीप्रमाणे विकता येणार नाहीत.

या निर्णयाचा थेट परिणाम सामान्य ग्राहकांवर होणार आहे. किरकोळ खोकला किंवा सर्दीसाठी स्वतःच्या मनाने कफ सिरप खरेदी करण्याचा पर्याय आता उपलब्ध राहणार नाही. डॉक्टरांच्या तपासणीनंतर मिळालेल्या प्रिस्क्रिप्शनवरच मेडिकल स्टोअर्सना ही औषधे विकता येतील. नियमांचे उल्लंघन करणाऱ्या औषध विक्रेत्यांवर कायदेशीर कारवाई तसेच परवाना रद्द करण्याची कारवाई होऊ शकते.