विरोधी पक्ष नेते काँग्रेस खासदार राहुल गांधी यांनी पंतप्रधान नरेंद्र मोदी यांच्यावर जोरदार हल्लाबोल केला आहे. सध्या पंतप्रधान नरेंद्र मोदी हे इटलीत आहेत. या दौऱ्यादरम्यान मोदींनी इटलीच्या पंतप्रधान जॉर्जिया मेलोनी यांना 'मेलोडी' चॉकलेट गिफ्ट दिलं. मात्र, देशात आर्थिक संकट असताना चॉकलेट गिफ्ट देताय, असं म्हणत काँग्रेस नेते राहुल गांधी यांनी पंतप्रधान नरेंद्र मोदी यांच्यावर जोरदार हल्लाबोल केला आहे.

काँग्रेस नेते राहुल गांधी यांनी एका सभेदरम्यान देशातील आर्थिक स्थितीवरून पंतप्रधान नरेंद्र मोदींवर टीका केली. राहुल गांधी म्हणाले, 'शेतकऱ्यांना खत मिळणार नाही, त्याची तयारी आतापासून करा. भारतातील तेल दुसऱ्या देशात निर्यात केलं जात आहे. कोट्यवधी रुपयांचं तेल दुसऱ्या देशात जात आहे. ते तेल भारताला हवंय. ते तेल भारतात राहणाऱ्या लोकांना हवंय.

'मी मागच्या बैठकीत म्हटलं, पंतप्रधान नरेंद्र मोदी आणि गृहमंत्री अमित शहा हे संविधानावर हल्ला करताहेत. ही बाब चूक आहे की बरोबर आहे, हे तुम्हीच सांगा. अदानींना देशाचं धन देणे, हा संविधानावर आक्रमण करत आहे. भारतातील सर्व विद्यापीठांच्या कुलगुरूपदी 'आरएसएस'च्या सदस्यांना बसवून आक्रमण करत आहेत. निवडणूक आयोग, न्यायसंस्थेवर हल्ला करणे म्हणजे संविधानावर आक्रमण करत आहे, असं राहुल गांधी यांनी म्हटलं.

संविधान म्हणजे भारत, संविधान म्हणजे भारतीयांचा आवाज. संविधान नष्ट करणाऱ्यांना काय म्हणाल, त्यांना गद्दार म्हणावे लागेल. नरेंद्र मोदी आणि अमित शहा हे संविधानावर आक्रमण करत आहे. त्यांनी देशाची संपत्ती अदानी आणि अंबानी यांना वाटली. त्यांनी देशातील संस्था नष्ट केल्या. मतचोरी केली. मी कधीही माफी मागणार नाही. नरेंद्र मोदी आणि अमित शहा हे गद्दार आहेत, असे म्हणत राहुल गांधींनी जोरदार हल्लाबोल केला.