बिहारमध्ये एका व्यावसायिकाची भररसत्यावर गोळीबार करून हत्या केल्यानंतर आता पंजाबमधूनही धक्कादायक बातमी समोर येत आहे. पंजाबमधील अबोहर शहरात सोमवारी सकाळी काही अज्ञात हल्लेखोरांनी कापड व्यावसायिक आणि सामाजिक कार्यकर्त्याची गोळ्या घालून हत्या केली. व्यापाऱ्याच्या हत्येमुळे परिसरात खळबळ उडाली आहे. दुकानाबाहेर गाडीतून उतरत असताना ही हत्या करण्यात आली. लॉरेन्स गँगने पोस्ट करत हत्येची जबाबदारी स्वीकारली आहे.

संजय वर्मा असे कापड व्यावसायिकाचे नाव आहे. घटनेच्या दिवशी दुकानाबाहेर गाडीतून बाहेर पडत असताना त्यांच्यावर हल्ला करण्यात आला. या हत्येचा सीसीटीव्ही फुटेज समोर आला आहे. ज्यामध्ये आरोपी कारमधून पळून जात असल्याचं दिसून येत आहे. सध्या माहिती मिळताच पोलिसांनी संपूर्ण प्रकाराचा तपास सुरू केला.

घटनेची माहिती देताना एका पोलीस अधिकाऱ्याने सांगितले की, 'कापड व्यापारी आणि सामाजिक कार्यकर्ते संजय वर्मा यांची हत्या करण्यात आली आहे. त्यांची हत्या सोमवारी सकाळी १० वाजण्याच्या सुमारास करण्यात आली आहे. दुकानाबाहेर ४-५ आरोपींनी त्यांच्यावर गोळीबार केला. माहिती मिळताच पोलीस घटनास्थळी पोहोचले. सध्या पोलिसांकडून तपास सुरू आहे. लवकरच गुन्हेगारांना अटक केली जाईल', अशी माहिती पोलिसांनी दिली.

या घटनेनंतर वर्मा यांच्या कुटुंबाने संताप व्यक्त केला. तसेच पोलिसांवर रोष व्यक्त केला. दिवसाढवळ्या गोळीबार होत आहे, पोलीस पूर्णपणे अपयश ठरले आहेत, असं वर्माच्या कुटुंबियांनी म्हटलं आहे. आरोपींनी वर्मा यांच्यावर १० ते १२ गोळ्या झाडल्याची माहिती आहे. लॉरेन्स गँगने या हत्येची जबाबदारी घेतली आहे.

आरजू बिश्नोई नावाच्या एका माजी हँडलरकडून एक पोस्ट करण्यात आली आहे. 'जय श्री राम.. सर्व भावांना राम राम.. मी गोल्डी ढिल्लो, आरजू बिश्नोई आणि शुभम लोनकर अबोहरमध्ये झालेल्या हत्येच जबाबदारी घेत आहोत', या घटनेनंतर परिसरात खळबळ उडाली आहे.