फिलिपाईन्सच्या दक्षिण भागात मोठी दुर्घटना घडली आहे. ३५० प्रवाशांना घेऊन जाणारी बोट समुद्रात बुडाली. ही दुर्घटना सोमवारी पहाटे घडली. या दुर्घटनेत आतापर्यंत १५ जणांचा मृत्यू झाला आहे. तर २८ जण बेपत्ता आहेत. 'एएफपी' (AFP) या वृत्तसंस्थेच्या रिपोर्टनुसार बचाव पथकाने किमान ३०१ प्रवाशांना सुखरूप वाचवण्यात आलंय.

हाती आलेल्या माहितीनुसार, अपघाग्रस्त बोट एक 'इंटर-आयलंड कार्गो आणि पॅसेंजर फेरी' होती. ही बोट झांबोआंगा या बंदर शहरातून सुलू प्रांतातील जोलो बेटाकडे जात होती. त्यादरम्यान बोटीचा अपघात झाला. या बोटीत ३३२ प्रवासी आणि २७ क्रू मेंबर्स (कर्मचारी) होते. मध्यरात्रीनंतर बोटीमध्ये तांत्रिक बिघाड झाला होता, त्यानंतर बोट बुडू लागली, असे अधिकाऱ्यांनी सांगितले.

कोस्ट गार्डच्या माहितीनुसार,प्रवासाला निघाल्यानंतर साधारण ४ तासांनी स्थानिक वेळेनुसार सोमवारच्या दरम्यान पहाटे १:५० वाजता जहाजाने संकटाचा सिग्नल पाठवला होता. कोस्ट गार्ड कमांडर रोमेल दुआ यांनी एएफपीला दिलेल्या माहितीनुसार, बालुक द्वीप गावापासून साधारण २ किलोमीटर अंतरावर ही बोट बुडाली. समुद्रात बुडणाऱ्या ३१६ लोकांना रेस्क्यू करून बेटावर पोहोचवण्यात आले. यातील १५ जणांच्या मृत्यूची पुष्टी झाली असून २८ जण अजूनही बेपत्ता आहेत.

दुआ बचाव कार्यासाठी कोस्ट गार्डचे एक विमानही पाठवण्यात आले होते. तसेच नौदल आणि वायुसेनेने मदतीसाठी आपली पथके रवाना केली. बसिलनचे गव्हर्नर मुजीब हाटामन यांनी मिंडानाओच्या इसाबेला पोर्टवरील घटनास्थळाचे व्हिडिओ क्लिप्स फेसबुकवर शेअर केलेत. यामध्ये वाचवलेल्या लोकांना बोटीतून बाहेर काढले जात असल्याचे दिसत असून, काही प्रवाशांना स्ट्रेचरवरून नेले जात असल्याचं दिसत आहे.

दरम्यान बोट नेमकी का बुडाली, याचं कारण अद्याप स्पष्ट झालेलं नाहीये. या प्रकरणाची चौकशी केली जाईल, असे दुआ यांनी सांगितलं. बंदरातून निघण्यापूर्वी कोस्ट गार्डने या बोटीला परवानगी दिली होती आणि ओव्हरलोडिंगचे कोणतेही संकेत नव्हते, असंही त्यांनी सांगितलं.