BJP MLA Raja Singh Arrested| हैदराबाद: तेलंगणाचे भाजप आमदार राजा सिंह यांना पोलिसांनी अटक केली आहे. पैगंबर मोहम्मद यांच्याबद्दल वादग्रस्त विधान केल्यानं राजा सिंह यांच्याविरोधात गुन्हा दाखल करण्यात आला होता. नेहमीच वादग्रस्त वक्तव्य करून चर्चेत राहणारे सिंह हे यावेळी अडचणीत सापडले आहेत.

राजा सिंह यांच्याविरोधात कलम २९५ (ए), १५३ (ए) आणि अन्य कलमान्वये गुन्हा दाखल करण्यात आला. हैदराबादचे डीसीपी (दक्षिण विभाग) पी साई चैतन्य यांनी याबाबत माहिती दिली. दुसरीकडे, राजा सिंह यांच्याविरोधात मुस्लीम समाजातील विविध संघटनांनी आंदोलन (Protest) केले आहे. या प्रकरणी पोलिसांनी काही जणांना ताब्यातही घेतले आहे.

राजा सिंह यांनी स्टँडअप कॉमेडियन मुन्नवर फारुखीचा हैदराबादमधील कार्यक्रम रोखण्याचा बराच प्रयत्न केला होता. मात्र, तेलंगणा पोलिसांच्या (Police) कडेकोट सुरक्षेनंतर हा कार्यक्रम झाला.

त्यानंतर राजा सिंह हे संतापले होते. त्यांनी मुन्नवर फारुखी आणि समाजाच्या विरोधात वादग्रस्त टिप्पणी करणारा व्हिडिओ शेअर केला. त्यात शिवीगाळही करण्यात आली होती. हा वादग्रस्त व्हिडिओ सोशल मीडियावर व्हायरल झाल्यानंतर संताप व्यक्त करण्यात येत होता.

मुस्लीम समाजातील काही संघटनांनी रस्त्यावर उतरून राजा सिंह यांच्याविरोधात आंदोलन केले. अनेक पोलीस ठाण्यांमध्ये राजा सिंह यांच्याविरोधात तक्रारी दाखल केल्या. तसेच राजा सिंह यांना अटक करण्याची मागणी केली. शहराच्या पोलीस आयुक्तांच्या कार्यालयासमोर ठिय्या मांडण्यात आला.