उत्तर प्रदेशातील मिर्झापूर जिल्ह्यातील जिगना पोलीस ठाणे हद्दीतील नेगुरा रिबई सिंह गावातील भाजप नेत्या विद्या सिंह यांच्या २२ वर्षीय मुलाचा रस्ते अपघातात मृत्यू झाला. दीपक सिंह असे मृत तरुणाचे नाव आहे. ध्वजारोहणाचा कार्यक्रम आटोपून दुचाकीवरून घरी परतत असताना प्रयागराजमधील मांडा पोलीस ठाणे हद्दीत हा अपघात झाला. विद्या सिंह या भाजपच्या छानबे मंडळाच्या उपाध्यक्ष आहेत. त्यांचा मुलगा दीपक गेल्या दोन महिन्यांपासून मध्य प्रदेशातील चाकघाट येथे एका मायक्रो फायनान्स कंपनीत नोकरी करत होता.

कुटुंबीयांनी दिलेल्या माहितीनुसार, स्वातंत्र्यदिन साजरा केल्यानंतर दीपक शनिवारी सकाळी दुचाकीवरून घरी परतत होता. सकाळी साडेदहा वाजण्याच्या सुमारास गौरीशंकरजवळ समोरून येणाऱ्या भरधाव ऑटोने त्याच्या दुचाकीला जोरदार धडक दिली. या अपघातात दीपक गंभीर जखमी झाला. स्थानिक नागरिकांनी घटनेची माहिती पोलिसांना दिली. कुटुंबीयही घटनास्थळी दाखल झाले. त्यानंतर दीपकला उपचारासाठी प्रयागराजला घेऊन जात असताना रस्त्यातच त्याचा मृत्यू झाला.

दीपक हा दोन भाऊ आणि दोन बहिणींमध्ये सर्वात लहान होता. तो अविवाहित होता. त्याचा मोठा भाऊ विकास सिंह सोनभद्र येथे नोकरी करतो. दीपकच्या मृत्यूची बातमी समजताच कुटुंबावर दुःखाचा डोंगर कोसळला. प्रयागराज येथे शवविच्छेदनाची प्रक्रिया पूर्ण झाल्यानंतर शनिवारी संध्याकाळी दीपकचा मृतदेह गावात आणण्यात आला. मृतदेह घरी पोहोचताच कुटुंबीयांनी एकच आक्रोश केला. संपूर्ण गावावर शोककळा पसरली.

दीपकच्या निधनाची माहिती मिळताच भाजपचे जिल्हा महामंत्री स्वामीनाथ सिंह यांच्यासह वीरेंद्र कुमार तिवारी, इंद्र कुमार सिंह, राजेंद्र पाठक, सुजीत मोदनवाल यांच्यासह अनेक भाजप नेते आणि ग्रामस्थांनी त्यांच्या घरी जाऊन कुटुंबीयांचे सांत्वन केले. अचानक झालेल्या या मृत्यूमुळे कुटुंबीयांसह संपूर्ण गावात हळहळ व्यक्त होत आहे.