BJP Leader Surendra Kevat Shot Dead In Patna : नितीशकुमार यांच्या बिहारमध्ये हत्येच्या घटना थांबायचं नाव घेत नाहीत. व्यावसायिक, भाजप नेता गोपाल खेमका यांच्या हत्या होऊन आठवडाही झाला नाही, तोच पुन्हा एकदा बिहारमध्ये आणखी एका भाजप नेत्याची हत्या झाली. शनिवारी रात्री अंधाराचा फायदा घेत दुचाकीवर आलेल्या दोघांनी पटनामधील स्थानिक भाजप नेत्याची गोळ्या झाडून हत्या केली. या घटनेचे पडसाद बिहारमध्ये उमटले आहेत. तेजस्वी यादव यांनी नीतीश कुमार यांच्यावर निशाणा साधलाय. चूक कुणाची आहे? कुणाला जाब विचारायचा? असा सवाल यादव यांनी उपस्थित केलाय. हत्या झालेल्या भाजप नेत्याचे नाव सुरेंद्र केवट असं आहे. शनिवारी रात्री ते शातामधील पाण्याची मोटर बंद करण्यासाठी गेले होते, त्यावेळी अंधारात दोन जणांनी डाव साधत गोळ्या झाडून हत्या केली.

पटनामधील पीपरा पोलीस स्टेशन हद्दीमध्ये भाजप नेते सुरेंद्र केवट यांची क्रूरपणे हत्या करण्यात आली. दुचाकीवरून आलेल्या दोन अज्ञात गुंडांनी त्यांच्यावर चार राऊंड फायर गेल्या. जखमी अवस्थेत त्यांना रूग्णालयात दाखल करण्यात आले, पण उपचारावेळी त्यांचा मृत्यू झाला. सुरेंद्र केवट (५२) हे भाजप किसान मोर्चाचे पुनपुनचे माजी अध्यक्ष होते. या घटनेची माहिती मिळताच फुलवारीशरीफ विधानसभा क्षेत्राचे आमदार गोपाल रविदास आणि माजी मंत्री श्याम रजक रुग्णालयात पोहोचले. परिसरात संतापाचे वातावरण आहे.

सुरेंद्र केवट कोण होते? Who was Surendra Kevat, BJP leader shot in Bihar?

सुरेंद्र केवट हे आपल्या कुटुंबासह शेखपुरा गावात राहत होते. ते पुनपुन प्रखंडातील भाजप नेते असण्यासोबतच ग्रामीण पशुवैद्यकही होते. सुरेंद्र शेती-कामकाज करत होते, ते अत्यंत साधं जीवन जगत होते. राजकारणात त्यांची चांगली पकड होती. शनिवारी मध्यरात्री जेवण करून ते दुचाकीने आपल्या गावाकडे जात होते. गावाबाहेरील बिहटा-सरमेरा राज्य महामार्ग-78 वर त्यांच्यावर गोळ्या झाडण्यात आल्या. ते शेतात मोटर बंद करण्यासाठी गेले होते आणि दुचाकीवर बसताच त्यांच्यावर हल्ला झाला. केवट यांच्यावर हल्ला का झाला? याबाबत अद्याप कोणतीही माहिती समोर आलेली नाही.

हल्लेखोरांचा शोध सुरू केला

केवट यांच्यावर हल्ला झाल्याची माहिती मिळताच पोलिसांनी घटनास्थळी धाव घेतली. या प्रकरणी अज्ञात गुंडांविरुद्ध गुन्हा दाखल करण्यात आला आहे. पोलीस घटनास्थळाजवळील सीसीटीव्ही कॅमेरे तपासत आहेत. फुटेजच्या मदतीने आरोपींची ओळख पटवली जाईल. या घटनेमुळे राज्याच्या सुरक्षा व्यवस्थेवरही प्रश्न उपस्थित झाले आहेत.