राजस्थानमधील बहुचर्चित भाजप नेते जयपाल पुनिया हत्याकांडमध्ये मोठी अपडेट समोर आली आहे. एडिजे न्यायालयने चार वर्ष जुन्या खटल्याचा निकाल देत माजी मुख्य आरोपी मोती सिंग, आमदार महेंद्र चौधरी याच्यासह नऊ दोषीना जन्मठेपेची शिक्षा सुनावली आहे.

दिवसाढवळ्या झालेल्या हत्येमुळे हादरले होते राजस्थान

भाजप नेते जयपाल पुनिया यांची 14 मे 2022 रोजी निर्घृणपणे हत्या केली होती. बोलेरो गाडीतून आलेल्या हल्लेखोरांनी दिवसाढवळ्या त्यांच्यावर अंदाधुंद गोळीबार केला. या हत्येमुळे राजस्थानमध्ये मोठा हादरा बसला होता. वकील बोदाराम चौधरी यांनी यावर प्रतिक्रिया दिली, न्यायालयाने मोती सिंगला खून (कलम ३०२) आणि कट (कलम १२०ब) या गुन्ह्यांमध्ये दोषी ठरवले. संदीप, तेजपाल, कृष्ण कुमार, हारून, रणजीत, राजेश, फारूक आणि दुसरा राजेश या इतर आठ दोषींनाही जन्मठेपेची शिक्षा सुनावण्यात आली. न्यायालयाने प्रत्येक दोषीवर १,००,००० रुपयांचा दंडही ठोठावला.

इतर कलमांनुसार (४२७, ३४१ आणि १४८) अतिरिक्त शिक्षा आणि दंडही आकारण्यात आले आहेत. दंड न भरल्यास एक वर्षाचा अतिरिक्त तुरुंगवास भोगावा लागेल. मात्र कुठलाही पुरावा न सापडल्याने दोन आरोपींची निर्दोष मुक्तता करण्यात आली.

पीडितेच्या कुटुंबीयांच्या डोळ्यांत अश्रू

निकालानंतर जयपाल पुनिया यांच्या पत्नी सरिता पुनिया भावुक झाल्या. त्या म्हणाल्या, माझा न्यायव्यवस्थेवर आणि देवावर अढळ विश्वास होता. आज माझ्या पतीला न्याय मिळाला आहे. जे लोक कायदा हातात घेतात, त्यांच्यासाठी हा निकाल एक कडक संदेश आहे, असे त्या म्हणाल्या.