बिहारमधील गया जिल्ह्यातील बाराचट्टी येथील विधानसभा मतदारसंघाच्या आमदार ज्योति मांझी यांच्या ताफ्यावर हल्ला झाला आहे. ज्योति मांझी या हिंदुस्तान आवाम मोर्चा पार्टीच्या आमदार आहेत. ही घटना मोहनपूर प्रखंडच्या बमुआर पंचायतीच्या गंभीरा गावात झाली. हाती आलेल्या माहितीनुसार, हल्लेखोरांनी आमदाराचा ताफा अडवण्यात आला, त्यानंतर त्यांच्याशी गैरवर्तन करण्यात आलं. इतकेच नाही तर आमदाराच्या सुरक्षा रक्षकांना मारहाणदेखील केली.

रस्ता अडवून आमदाराच्या ताफ्यावर हल्ला करण्यात आला

आमदार ज्योती मांझी रविवारी मोहनपूर तालुक्यातीलगंभीरा गावात एका सामाजिक कार्यक्रमाला उपस्थित राहण्यासाठी जात होत्या. एका प्रवासी वाहनाने त्यांच्या ताफ्याचा मार्ग अडवला. चालकाने जाणीवपूर्वक वाहन रस्त्याच्या मधोमध उभे करून वाहतुकीला अडथळा निर्माण केला असा आरोप करण्यात येत आहे. ज्यावेळी आमदाराच्या सुरक्षा रक्षकांनी रस्त्यात उभे केलेले वाहन बाजुला करण्यास सांगितलं तेव्हा गाडीमध्ये बसलेले १५ ते २० जण खाली उतरले आणि त्यांनी सुरक्षा रक्षकांसह वाद घालण्यास सुरुवात केली.

हल्ला झाला त्यावेळी आमदार ज्योति मांझी या आपल्या स्कॉर्पियो कारमध्ये बसून राहिल्या. हल्लेखोरांनी त्यांना जातीवाचक शिवीगाळ केली. कारच्या काचा तोडल्या. परिस्थिती अत्यंत तणावपूर्ण होती आणि त्यांना स्वतःच्या सुरक्षेची भीती वाटत होती, असं आमदार ज्योति मांझी यांनी सांगितले. गावकऱ्यांच्या मदतीने ज्योति मांझी यांना सुरक्षितस्थळी नेण्यात आले. या घटनेनंतर आमदारांनी जवळच्या गावकऱ्यांना माहिती दिली.

स्थानिक रहिवासी घटनास्थळी पोहोचल्यानंतर आमदार, त्यांचे अंगरक्षक आणि समर्थकांना सुरक्षितपणे बाहेर काढण्यात आले. याप्रकरणी आमदारने मोहनपूर येथील पोलीस स्टेशनमध्ये तक्रार दाखल केली आहे. एफआयआरमध्ये अनेक लोकांची नावे दाखल करण्यात आली आहेत. तर अनेक अज्ञातांना आरोपी बनवण्यात आले आहे.