एकीकडे बिहार विधानसभा निवडणुकीचा जल्लोष सुरु असताना मुझफ्फरपूरमध्ये दुर्दैवी घटना घडली आहे. शहराच्या मोतीपूर पोलीस स्टेशनच्या हद्दीत वॉर्ड-१३ मध्ये एका घराला आग लागल्याची घटना घडली. या घराला लागलेल्या आगीत ५ जणांचा मृत्यू झाला आहे. तर ५ लोक आगीत होरपळले आहेत. मृत्यू झालेले आणि आगीत जखमी झालेले लोक एकाच कुटुंबातील सदस्य आहेत. घरात शॉर्ट सर्किट झाल्याने घराला आग लागल्याचं बोललं जात आहे. या आगीत जखमी झालेल्या लोकांना तातडीने रुग्णालयात दाखल करण्यात आलं आहे.

पोलीस अधिकारी सुचित्रा कुमारी यांनी सांगितलं की, घराला आग ही शॉर्ट सर्किट झाल्यामुळे लागली. अग्निशमन दलाचे जवान तातडीने घटनास्थळी पोहोचत जखमींना आगीतून बाहेर काढलं. अग्निशमन दलाने अथक प्रयत्नाने आगीवर नियंत्रण मिळवलं. गेना साह यांच्या घराला ही आग लागली. आगीने रौद्ररुप धारण केल्याने क्षणात संपूर्ण घराला आग लागली. काही लोकांचा झोपेतच मृत्यू झाला. घरातील काही जखमींना स्थानिक आणि पोलिसांनी बाहेर काढलं.

घटनेत जखमी झालेल्या लोकांनी जवळील रुग्णालयात दाखल केलं. मृतांमध्ये ललन साह, त्यांची आई, पत्नी आणि २ मुलांचा समावेश आहे. एकाच कुटुंबातील पाच जणांच्या मृत्यूने परिसरात खळबळ उडाली आहे. या घटनेनंतर लोक त्यांच्या घरातील वीज जोडणीची तपासणी आणि दुरुस्ती करण्यासाठी धावपळ करताना दिसत आहेत.

प्राथमिक तपासात ही आग शॉर्ट सर्किटमुळे लागल्याची माहिती मिळाली. या प्रकरणाची सर्व बाजूने तपासणी केली जात आहे. पीडितांच्या नातेवाईकांना संपर्क साधण्यास सुरुवात केली आहे. एकाच कुटुंबातील ५ जणांचा आगीत मृत्यूने झाल्याने स्थानिक नागरिकांकडून हळहळ व्यक्त करण्यात येत आहे.