बिहार विधानसभा निवडणुकांचा दुसरा टप्पा पार पडल्यानंतर एक्झिट पोलचे आकडे समोर आलेत. एक्झिट पोलचे आकडे एनडीए आणि महागठबंधनची धकधक वाढवणारे आहेत. संध्याकाळी ६ वाजता विधानसभा निवडणुकांचा दुसरा टप्पा पार पडला. यानंतर संध्याकाळी साडेसहा वाजता एक्झिट पोलचा अंदाज जाहीर करण्यात आलेत. यात भाजपची चिंता वाढवणारे आकडे एक्झिट पोलमधून समोर आलेत.

या एक्झिट पोलनुसार, बिहार राज्यात नितीश कुमार यांच्या नेतृत्वाखालील एनडीए सरकार पुन्हा सत्तेत येणार असल्याचं दिसत आहे, मात्र एक-एका पक्षाला मिळालेल्या जागा कमी आहेत. बिहार निवडणुकीसाठीच्या पोलस्ट्रॅट एक्झिट पोलनुसार, एनडीएमध्ये भाजपला ६८-७२, जेडीयूला ५५-६०, एलजेपी (आर)ला ९-१२, एचएएमला १-२ आणि आरएलएमला ०-२ जागा मिळतील असे दिसून येत आहे.

बिहार विधानसभा निवडणुका दोन टप्प्यात पार पडल्या. ६ नोव्हेंबर रोजी पहिल्या टप्प्यात ६५.०८ टक्के इतके विक्रमी मतदान झाले. त्यानंतर दुसऱ्या टप्प्यातही मतदारांनी मोठ्या उत्साहाने सहभाग घेतला. यावेळी महिला आणि तरुण मतदारांचा सहभाग जास्त होता. दुसऱ्या टप्प्यात ६७.१४ टक्के मतदान झालं. यामुळे येथील वाढलेलं मतदान पाहून सत्ताधारी आणि विरोधी पक्षांनी आपल्या विजयाचा दावा केला. मात्र हाती आलेल्या एक्झिट पोलनुसार महागठबंधनचा पराभव होणार असल्याचं चित्र दिसत आहे.

एक्झिट पोलमध्ये NDA ला १३३-१४८ जागा मिळण्याचा अंदाज

POLSTRAT ने बिहार निवडणुकीसाठीचा एक्झिट पोल प्रसिद्ध केला आहे. यात NDA ला १३३-१४८ जागा, महाआघाडीला ८७-१०२ आणि इतरांना ३-५ जागा मिळतील असा, अंदाज आहे.

चाणक्य स्ट्रॅटेजीज पोलमध्ये एनडीएला १३०-१३८ जागा मिळण्याचा अंदाज आहे. चाणक्य स्ट्रॅटेजीजमध्ये एनडीएला १३०-१३८ जागा, महाआघाडीला १००-१०८ आणि इतरांना ३-५ जागा मिळण्याचा अंदाज आहे.

आधी २०२० च्या विधानसभा निवडणुकीत विजय मिळवल्यानंतर एनडीएने बिहारमध्ये सरकार बनवलं होतं. एनडीएने एकूण १२५ जागा जिंकल्या, तर महागठबंधनने ११० जागा जिंकल्या होत्या. ७५ जागांसह आरजेडी सर्वात मोठा पक्ष म्हणून उदयास आला होता.

एनडीए आघाडीच्या जागा

भाजप ७४

जेडीयू - ४३

विकासशील इंसान पार्टी (VIP) - ४

हिंदुस्थानी अवाम मोर्चा (HAM)- ४