TVK Forms Government in Tamil Nadu, Suvendu Adhikari to Take Oath as Bengal CM : तामिळनाडू आणि पश्चिम बंगाल या दोन्ही राज्यांमध्ये विधानसभा निवडणुकांनंतर आता सत्तास्थापनेचा मार्ग मोकळा झाला आहे. पश्चिम बंगालमध्ये भाजपचे सुवेंदू अधिकारी मुख्यमंत्री म्हणून शपथ घेणार आहेत. तर तामिळनाडूमध्ये थलापती विजय यांनी सत्तास्थापनेच्या आकड्याचे गणित जुळवले आहे. ते आज मुख्यमंत्री म्हणून शपथ घेणार आहेत. सकाळी ११ वाजता शपथविधी सोहळा पार पडणार आहे. दोन्ही राज्यात सकाळी ११ वाजता शपथविधी सोहळा पार पडणार आहे.

तामिळनाडूत 'थलपती' विजयचं सरकार

तामिळनाडूमध्ये विजय यांच्या 'तमिलगा वेत्री कळघम' (TVK) पार्टीने विधानसभा निवडणुकीत १०८ जागा जिंकून इतिहास घडवला. पण सुरुवातीला बहुमतासाठी काही जागा कमी पडल्याने राजकारण तापले होते. पण आता विजय यांना काँग्रेससह काही डाव्या पक्षांनी पाठिंबा जाहीर केला आहे.

विजय यांचा शपथविधी शनिवारी (९ मे २०२६) सकाळी ११ वाजता होणार आहे. थलापती विजय यांनी राज्यपाल आर. एन. रवी यांची शुक्रवारी भेट घेऊन सत्ता स्थापनेचा दावा केला आहे. त्यांना CPI, CPI(M) आणि VCK या पक्षांनी पाठिंबा दिला आहे. त्यामुळे त्यांनी बहुमताचा आकडा (११८) पूर्ण केला आहे.

सुवेंदू अधिकारी नवे मुख्यमंत्री

पश्चिम बंगालमध्ये भाजपने ममता बॅनर्जींच्या तृणमूल काँग्रेसचा दारूण पराभव करत सत्ता खेचून आणली. विधानसभा निवडणुकीनंतर बंगालमध्ये सत्तातंतर झालेय. सुवेंदू अधिकारी यांची भाजप विधीमंडळ पक्षाच्या नेतेपदी एकमताने निवड झाली आहे. सुवेंदू अधिकारी यांचा शपथविधी सुद्धा शनिवारी (९ मे २०२६) सकाळी ११ वाजता कोलकाता येथील ऐतिहासिक ब्रिगेड परेड ग्राऊंडवर होणार आहे.

सुवेंदू अधिकारी यांच्या शपथविधी सोहळ्यासाठी स्वतः पंतप्रधान नरेंद्र मोदी, केंद्रीय गृहमंत्री अमित शहा, अनेक केंद्रीय मंत्री आणि भाजपशासित २० राज्यांचे मुख्यमंत्री उपस्थित राहणार आहेत. पश्चिम बंगाल विधानसभेच्या २९४ जागांपैकी भाजपने स्पष्ट बहुमत मिळवले आहे. सुवेंदू अधिकारी यांच्या नेतृत्वात भाजपने तृणमूल काँग्रेसला धोबीपछाड दिली आहे.