मुंबई : महाराष्ट्र विधानसभा निवडणुकीत महायुती विरुद्ध महाविकास आघाडी असा थेट सामना पाहायला मिळत आहे. विधानसभा निवडणुकीच्या शेवटच्या आठवड्यात राजकीय प्रचाराचा धडाका लावला आहे. सर्व उमेदवारांनी मतदारांना आकर्षित करण्यासाठी नवनवीन फंडे वापरण्यास सुरुवात केली आहे. दुसरीकडे मुख्यमंत्रिपदाच्या चेहऱ्याचीही जोरदार चर्चा सुरु आहे. याचदरम्यान, अमित शहा यांनी महायुतीच्या मुख्यमंत्रिपदाच्या चेहऱ्याविषयी मोठी घोषणा केली आहे.

केंद्रीय गृहमंत्री अमित शहा यांनी महायुतीच्या मुख्यमंत्रिपदाच्या चेहऱ्यावर मोठं भाष्य केलं. अमित शहा म्हणाले, 'राज्यात महायुतीचं सरकार येईल. विधानसभा निवडणुकीनंतर मुख्यमंत्रिपदाच्या चेहऱ्यावर निर्णय घेण्यात येईल'.

राज्यात २० नोव्हेंबर रोजी होणाऱ्या विधानसभा निवडणुकीसाठी भाजपने जाहीरनामा जाहीर केला. यावेळी अमित शहा यांनी महाराष्ट्रात महायुतीचा सत्ता येईल, असा विश्वास व्यक्त केला. अमित शहा पुढे म्हणाले, 'महायुतीने त्यांचा जाहीरनामा जाहीर केला आहे. तिन्ही पक्षाच्या मंत्र्यांची समिती स्थापन करण्यात आली आहे.

अमित शहा म्हणाले, 'आता एकनाथ शिंदे मुख्यमंत्री आहे. विधानसभा निवडणुकीनंतर तिन्ही पक्ष मुख्यमंत्रिपदाच्या चेहऱ्याबाबत निर्णय घेतील'. दरम्यान, महाराष्ट्रात विधानसभा निवडणुकीसाठी २० नोव्हेंबरला मतदान होणार आहे. तर २३ नोव्हेंबर रोजी या निवडणुकीचा निकाल जाहीर होईल. या निवडणुकीत महायुती आणि महाविकास आघाडीत थेट सामना आहे.

दरम्यान, आज आज केंद्रीय गृहमंत्री अमित शहा, मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि अजित पवार यांच्यात बंद दाराआड चर्चा झाली. या चौघांमध्ये झालेल्या बैठकीत १५-२० मिनिटं चर्चा झाल्याची माहिती हाती आली आहे. अमित शहांकडून महायुतीच्या प्रचाराचा आढावा घेतल्याची माहिती सूत्रांकडून मिळाली आहे. विकासाच्या मुद्द्यांवर आणि जाहीरनाम्यावर प्रचारात भर द्या, असा संदेश बैठकीत देण्यात आल्याची माहिती मिळत आहे.