अलिकडेच अमेरिकेचे राष्ट्राध्यक्ष डोनाल्ड ट्रम्प यांनी भारतावर २५ % टॅरिफ टॅक्स लादण्याची घोषणा केली. तसेच रशियाकडून तेल आयात करण्यासाठी दंड आकारणार असल्याचं सांगितलं. मात्र, आता डोनाल्ड ट्रम्प यांनी शनिवारी आणखी एक दावा केला आहे. भारत रशियन तेल आयात थांबवत असल्याच्या बातम्या ऐकल्या आहेत, हे एक चांगले पाऊल आहे, असं डोनाल्ड ट्रम्प म्हणाले आहेत. त्यांनी केलेल्या दाव्यामुळे पुन्हा खळबळ उडाली आहे.

डोनाल्ड ट्रम्प यांनी एएनआयला सांगितलं, 'मला माहिती मिळाली आहे की, भारत आता रशियाकडून तेल खरेदी करणार नाही आहे. मी जे काही ऐकले आहे, ते खरे आहे की नाही, हे मला काही माहित नाही. पण नक्कीच हे चांगले पाऊल आहे. पुढे काय घडतंय ते पाहू', असं डोनाल्ड ट्रम्प म्हणाले आहेत.

युक्रेन-रशिया युद्धाच्या पार्श्वभूमीवर अमेरिकेनं मॉस्कोच्या उत्पन्नाच्या स्त्रोतांवर आर्थिक निर्बंध लादण्याचे प्रयत्न केले होते. त्यानंतर रशियन तेल खरेदी करणाऱ्या देशांवर अमेरिका सातत्याने दबाव वाढवत होती. २०२२ साली रशियावर लादलेले पश्चिमी निर्बंध लागू झाल्यानंतर भारत हा जगातील तिसरा सर्वात मोठा तेल आयातदार देश म्हणून सवलतीच्या दरात मोठ्या प्रमाणात रशियन तेल खरेदी करत आहे.

दरम्यान, काही मीडिया रिपोर्टनुसार, अलीकडे रशियन तेलाच्या सवलतीत घट झाल्याने आणि शिपिंगशी संबंधित अडचणींमुळे भारतीय सरकारी रिफायनर्‍या गेल्या आठवड्यात रशियन तेल खरेदी करू शकल्या नाहीत. मात्र, या वृत्ताला अद्याप अधिकृत दुजोरा मिळालेला नाही.