America Plane Crash Accident News Update अमेरिकेतून मोठी बातमी समोर आली आहे. अमेरिकेतील मिसौरी राज्यात रविवारी झालेल्या भीषण विमान अपघातात १२ जणांचा दुर्दैवी मृत्यू झाला आहे. हा अपघात मिसौरीमधील बटलर मेमोरियल विमानतळाजवळ घडला असल्याचे समोर आले आहे. या दुर्घटनेमुळे संपूर्ण परिसरात शोककळा पसरली असून स्थानिक प्रशासनाने बचाव आणि तपास कार्य सुरू केले आहे.

मिळालेल्या माहितीनुसार, विमान उड्डाणानंतर काही वेळातच कोसळल्याची प्राथमिक माहिती समोर आली आहे. अपघात इतका भीषण होता की विमानातील सर्व १२ जणांचा घटनास्थळीच मृत्यू झाला. मृतांमध्ये ११ स्कायडायव्हर्स आणि एका पायलटचा समावेश असल्याचे बेट्स काउंटी आपत्कालीन व्यवस्थापन विभागाने स्पष्ट केले आहे. बटलर हे शहर मिसौरीमधील कॅन्सस सिटीच्या दक्षिणेस सुमारे ६० मैल अंतरावर आहे. अपघातानंतर तातडीने आपत्कालीन यंत्रणा घटनास्थळी दाखल झाली. मात्र, विमान जळून खाक झाल्याने कोणालाही वाचवता आले नाही. दुर्घटनेनंतर परिसरातील नागरिकांमध्ये हळहळ व्यक्त केली जात आहे.

शासनाने सोशल मीडिया प्लॅटफॉर्मवर पोस्ट करताना, "विमानातील सर्व १२ प्रवाशांचा मृत्यू झाला असल्याची माहिती दिली. दरम्यान, विमान अपघाताचे नेमके कारण अद्याप स्पष्ट झालेले नाही. हवामानातील बदल, तांत्रिक बिघाड किंवा इतर कोणते कारण या दुर्घटनेमागे आहे का, याचा तपास संबंधित यंत्रणांकडून सुरू करण्यात आला आहे.

अमेरिकेतील नागरी विमान वाहतूक प्रशासन आणि राष्ट्रीय परिवहन सुरक्षा मंडळाचे (NTSB) अधिकारीही घटनास्थळी पोहोचले असून त्यांनी तपासाची सूत्रे हाती घेतली आहेत. तपास पूर्ण झाल्यानंतरच अपघाताचे खरे कारण समोर येणार आहे. मृतांच्या कुटुंबीयांवर दुःखाचा डोंगर कोसळला असून प्रशासनाने त्यांना सर्वतोपरी मदत करण्याचे आश्वासन दिले आहे.