मुंबई : आपल्या पतीची हत्या करून त्याचा मृतदेह घरातच पुराणाऱ्या क्रूरकर्मा पत्नीला मुंबई च्या विनोबा भावे पोलिसांनी तिच्या साथीदारांसह अटक केली आहे. या महिलेने व तिच्या साथीदारांनी सदर व्यक्तीची हत्या करून त्याचा मृतदेह 18 जून रोजी घरातच पुरण्याचा निर्दयी आणि क्रूर प्रकार केला होता.

हे देखील पहा -

18 जून रोजी पुरलेला मृतदेह आज सकाळी फॉरेन्सिक डॉक्टरांच्या मदतीने पोलिसांनी बाहेर काढला आहे. मृत दिपक सांगळे हा 18 जून पासून बेपत्ता असल्याची तक्रार त्याच्या पत्नीने पोलीस ठाण्यात दिली होती. तर, दिपक याची पार्श्वभूमी ही गुन्हेगारी प्रवृत्तीची होती. त्याच्यावर अनेक गुन्हे दाखल होते, त्यामुळे तपासाला दिशा मिळत नव्हती. मात्र, पोलिसांनी केलेल्या तपासात दीपक हरवला नसून त्याची हत्या झाल्याचे निष्पन्न झाले.

दिपकची हत्या त्याचाच पत्नी ने केल्याचे तपासात उघड झाले आहे. खळबळजनक बाब म्हणजे पतीला जेवणातून बेशुद्ध होण्याचे औषध दिले आणि त्यानंतर त्याच्यावर तीक्ष्ण हत्याराने वार करत त्याची हत्या केली. हत्या केल्यानंतर दिपकचा मृतदेह घरातच पुरून दीपक हरवला असल्याचे नाटक रचण्यात आले. मात्र, पोलिसांनी हे नाट्य उधळून लावत हत्येचा छडा लावत 7 आरोपींना अटक केली असून पुढील तपास सुरु आहे.

Edited By : Krushnarav Sathe