संजय गडदे, मुंबई प्रतिनिधी

Borivali fruit shop viral video truth : मुंबईकरांच्या आरोग्याशी थेट खेळ करणारा एक धक्कादायक प्रकार समोर आल्याचा दावा सोशल मीडियावर व्हायरल होत असलेल्या एका व्हिडिओद्वारे केला जात आहे. बोरिवली (पश्चिम) परिसरातील एका फळविक्रेत्याच्या दुकानाचा असल्याचा दावा या व्हिडिओमध्ये करण्यात आला आहे. यामध्ये काही फळांवर उंदीर ताव मारताना आणि फळे कुरतडताना दिसत आहेत. या कथित उंदरांनी कुरतडलेल्या फळांचीच ग्राहकांना सर्रास विक्री केली जात असल्याचा आरोप सोशल मीडियावर केला जात आहे.

उंदरांमुळे प्लेग, लेप्टोस्पायरोसिस यांसारख्या अत्यंत गंभीर आजारांचा धोका निर्माण होऊ शकतो. त्यामुळे हा कथित व्हिडिओ समोर आल्यानंतर मुंबईकरांमध्ये भीती आणि संतापाचे वातावरण निर्माण झाले आहे.

यापूर्वीही फळांना कृत्रिम चमक आणण्यासाठी घातक रसायनांचा वापर केल्याचे, तसेच काही ठिकाणी फळे आणि भाजीपाला चक्क गटाराच्या पाण्यात धुतल्याचे व्हिडिओ समोर आले होते. त्यामुळे अन्नसुरक्षेचा (Food Safety) मुद्दा पुन्हा एकदा ऐरणीवर आला आहे.

दरम्यान, हा व्हिडिओ नेमका बोरिवलीतील कोणत्या दुकानाचा आहे आणि त्यामधील दाव्यांमध्ये कितपत तथ्य आहे, याची अधिकृत पुष्टी अद्याप झालेली नाही. अन्न व औषध प्रशासन (FDA) तसेच संबंधित स्थानिक प्रशासनाकडून या व्हिडिओची आणि त्यातील दाव्यांची पडताळणी सुरू असल्याची माहिती समोर आली आहे. अधिकृत तपासानंतरच या प्रकरणाचे नेमके सत्य समोर येईल.