>> सिद्धेश म्हात्रे

नवी मुंबई : लग्नसमारंभ म्हटलं की मानपान आला. या मानपानाच्या गडबडीत अनेकांची नाराजी वधू-वराच्या कुटुंबियांना सहन करावी लागते. अनेकदा छोटेमोठे वादही होतात. मात्र नवी मुंबईत लग्न समारंभात क्षुल्लक कारणावरुन मोठा राडा झाल्याचं पाहायलं मिळालं आहे. लग्नासारख्या शुभ मंगलसमयी रस्त्यावर तुंबळ हाणामारी झाल्याचं दृष्य आजूबाजूला राहणाऱ्यांना लोकांनी पाहिलं. (Viral Video)

लग्नासाठी आलेल्या वऱ्हाडी मंडळींमध्ये जोरदार हाणामारी झाल्याची घटना नवी मुंबईतील सीवूड नेरुळ येथे घडली आहे. या घटनेचा व्हिडीओ देखील समोर आला आहे. लग्नासाठी जमलेल्या दोन गटात हा राडा झाला. वऱ्हाडी नाचत असताना एका मुलीला एका मुलाचा धक्का लागला. यावरुन हा राडा झाल्याची माहिती समोर येत आहे. (Latest News Updates)

सीवूड नेरुळमधील सेक्टर 44 येथील लग्न समारंभाच्या हॉल बाहेरच ही सर्व घटना घडली. हॉलच्या समोरील इमारतीत राहणाऱ्या काही नागरिकांना या घटनेचा व्हिडीओ शूट केला आहे. हॉलच्या कर्मचाऱ्यांना हा सुरु असलेला वाद सोडवण्याचाही प्रयत्न केल्याचं व्हिडीओत दिसत आहे.

लग्न सोडून सगळं वऱ्हाड रस्त्यावर उतरलं होतं. त्यामुळे गाड्यांची ये-जा देखील काही वेळ थांबली होती. यासंबंधी अद्याप पोलीस ठाण्यात कोणतीही तक्रार दाखल झाली नसून हाणामारीनंतर वाद मिटवण्यात आल्याची माहिती समोर आली आहे.